Bayden saylovda g‘alaba qozonish uchun mashhur qo‘shiqchidan foydalanmoqchi

AQSH Prezidenti Jo Baydenning yordamchilari bo‘lajak prezidentlik saylovlarida mashhur amerikalik qo‘shiqchi Teylor Sviftning qo‘llab-quvvatlashidan umidvor. Bu haqda “Marca” nashri xabar berdi.

Nashrning yozishicha, Teylor AQSHda bo‘lib o‘tadigan 2024 yilgi prezidentlik saylovi natijalariga katta ta’sir o‘tkazishi mumkin. 

Yanvar oyi boshida “Redfield & Wilton Strategies” tomonidan o‘tkazilgan eksklyuziv so‘rovnomada saylovchilarning 18 foizi xonanda tomonidan ma’qullangan nomzodga ovoz berishini aytgan. So‘rov 1500 kishi orasida o‘tkazilgan bo‘lib, ularning 45 foizi "TS"ning muxlislari ekanini va u qaysi nomzodga ovoz berishni e’lon qilsa, xuddi shuni  tanlashini bildirgan.

“Teylor Svift Qo‘shma Shtatlardagi ko‘pchilikka ta’sir ko‘rsata oladi", deydi aloqa bo‘yicha maslahatchi Jeyms Xaggerti.

Misol uchun, 2020 yilgi saylovlarda Svift Baydenni qo‘llab-quvvatlagandi. Garchi avvalroq u sobiq prezident Trampni qattiq tanqid qilgan bo‘lsa-da, yangi mavsumda hali rasman biror nomzodga ovoz bermagan.

Eslatib o‘tamiz, amerikalik qo‘shiqchi Teylor Svift "Eras tour" deb nomlangan gastrol sayohati tarixdagi eng yuqori daromad keltirgan safar sifatida Ginnesning rekordlar kitobiga kiritilgandi.

Ulkanbayeva Rayxona