Baku Yerevanni terrorda ayblamoqda

Baku Armanistondan Ozarbayjonning Qorabog‘ mintaqasining ishg‘ol davridagi atrof-muhit va biologik xilma-xillikni keng ko‘lamda vayron qilgani uchun javobgarlikka tortilishini talab qilib, birinchi davlatlararo arbitraj jarayonini boshladi. Bu haqda Ozarbayjon Tashqi ishlar vazirligining payshanba kuni chop etilgan bayonotida aytiladi. 

“2023 yilning 18 yanvarida Ozarbayjon Yevropada yovvoyi fauna va flora hamda tabiiy yashash joylarini muhofaza qilish bo‘yicha Bern konvensiyasiga muvofiq birinchi davlatlararo arbitraj jarayonini boshladi”, deyiladi xabarda. 

TIVning qayd etishicha, maqsad Armanistonni 30 yillik istilo davrida Ozarbayjonning atrof-muhit va bioxilma-xilligini keng ko‘lamda vayron qilgani uchun javobgarlikka tortishdir. 

Bayonotda aytilishicha, Ozarbayjon atrof-muhitning buzilishiga oid barcha dalillarni to‘plagan. 

“Bu harakatlar mintaqadagi tabiiy yashash joylari va turlarga jiddiy zarar yetkazdi, tabiiy resurslarning kamayishiga va bioxilma-xillikning yo‘q qilinishiga olib keldi. Armanistonning bu qadamlari daryolar, jumladan, Armanistondan Ozarbayjon hududiga oqib o‘tadigan transchegaraviy daryolar ifloslanishning ekstremal darajasiga yetganiga olib keldi”, deyiladi TIV xabarida. 

Qayd etilishicha, 2022 yilda UNEP (Birlashgan Millatlar Tashkilotining Atrof-muhit dasturi) Armanistonda tog‘-kon sanoatining rivojlanishi qirg‘oq bo‘yidagi aholi punktlarida suv, tuproq, o‘simlik va hayvonot dunyosining kimyoviy ifloslanishiga olib kelganini, Oxchuchay daryosida yuzlab baliqlarning o‘lik holda topilgani va bir nechta himoyalangan baliq va amfibiya turlari yo‘qolib ketish xavfi ostida qolganini aniqlagan.

Tashqi ishlar vazirligi bayonotida aytilishicha, BMTning ekotizimlarni tiklash o‘n yilligi doirasida “Ozarbayjon xalqaro hamjamiyatni Armaniston tomonidan dunyodagi eng boy va biologik xilma-xil ekotizimlardan birini bosib olishi chog‘ida sodir etilgan dahshatli vayronagarchilikni qoralashga chaqiradi.

“Arbitraj jarayoni doirasida Ozarbayjon Armanistonni Bern konvensiyasining barcha davom etayotgan buzilishlarini to‘xtatish va avval bosib olingan hududlarda atrof-muhitni vayron qilgani uchun to‘liq tovon to‘lash majburiyatini yuklashni talab qiladi”, deyiladi TIV bayonotida.