Avstraliyada noma’lum kosmik ob’ekt topildi (video)

G‘arbiy Avstraliyadagi Pert shahridan 250 km uzoqlikda joylashgan Green Head sohilidan noma’lum kosmik ob’ekt topildi. Bu haqda “The Guardian” nashri xabar bermoqda.

15 iyul kuni politsiyaga mahalliy aholidan  noma’lum ob’ekt haqida ma’lumot kelib tushgan. Mis rangli ushbu ulkan ob’ekt silindr shakliga ega. U sezilarli darajada shikastlangan va bir tomonga og‘gan holda topilgan.

Politsiya ob’ektning 2014 yil Kuala Lumpurdan Pekin tomon sayohati vaqtida g‘oyib bo‘lgan  MH370 floti ekanligi haqidagi fikrni rad etdi.

"Biz ob’ektning kelib chiqishi va tabiatini aniqlash uchun turli davlat va federal idoralar bilan hamkorlikda ish olib boryapmiz. Tergov davom etmoqda va qo‘shimcha ma’lumotlar aniqlanmagunicha barchani xulosa chiqarishdan tiyilishga chaqiramiz", deyiladi politsiya bayonotida.

Ko‘pchilik ijtimoiy tarmoqlarda ushbu ob’ekt Hindistonning Polar sun’iy yo‘ldoshini ishga tushirish uchun uchirgan raketasining bir qismi ekanligini taxmin qilmoqda. Kosmik arxeologiya sohasi mutaxassisi doktor Alica Gorman ham bu fikrni qo‘llab-quvvatlashini bildirgan.

Eslatib o‘tamiz, shu oy boshida Britaniyaning Meduey daryosi bo‘ylaridan qadimgi davrga oid 800 dona tosh quroli topilgan.

Sevara Husniddinova