Armaniston Prezidenti vakolati kamligi sabab iste’foga chiqdi

Armaniston Prezidenti Armen Sarkisyan iste’foga chiqishini e’lon qildi. U vakolatlari kamligi sabab shunday qarorga kelgan.

“Men juda uzoq o‘yladim va deyarli to‘rt yillik faol ishimdan so‘ng Armaniston Prezidenti lavozimidan ketishga qaror qildim. Bu mutlaqo hissiy qaror emas va ma’lum bir mantiqqa asoslangan”, deyiladi Sarkisyanning rasmiy bayonotida.

Uning ta’kidlashicha, Prezidentda mamlakat va millat uchun hozirgi og‘ir davrda ichki va tashqi siyosatning fundamental jarayonlariga ta’sir o‘tkazish uchun zarur vositalar mavjud emas.

Davlatimiz uchun milliy birdamlik zarur bo‘lgan bugungi og‘ir davrda Prezident instituti jamoatchilik e’tiborini eng muhim masalalardan chalg‘itib, g‘iybat va fitna nazariyalariga aylanmasligi kerak. Bugun mazmunli, puxta o‘ylangan harakatlarga har qachongidanda muhtojmiz. Aks holda, biz, butun dunyo armanlari, o‘z missiyamizdan ko‘zlangan maqsadni amalga oshira olmaymiz, tarix chekkasida qolib ketamiz. Bizning endi xato qilishga haqqimiz yo‘q”, degan Sarkisyan.

Armaniston Prezidenti o‘z bayonotida jiddiy geosiyosiy o‘zgarishlar ro‘y bergan 90-yillar boshida arman xalqi o‘z mustaqil davlatini yaratish uchun eng keng imkoniyatlarga ega bo‘lganini ta’kidladi. 

“Ushbu tarixiy imkoniyatdan ilhomlanib, men ham ko‘plab vatandoshlarim kabi o‘zimni ushbu missiyaga bag‘ishladim. Ba’zi sabablarga ko‘ra turli bosqichlardagi ishtirokim o‘zgardi, lekin men milliy muvaffaqiyatimizga ishonishdan to‘xtamadim”, - dedi Sarkisyan bu uning prezident bo‘lish taklifiga rozi bo‘lishining asosiy sababi ekanini ta’kidlab.

Uning ta’kidlashicha, oradan biroz vaqt o‘tib, 2018 yilning aprel-may oylaridagi voqealar sodir bo‘lgan, o‘shanda Armanistonda inqilob yuz bergan, natijada hokimiyat tepasiga amaldagi Bosh vazir Nikol Pashinyan kelgan. Sarkisyan o‘shanda iste’foga chiqmaganini, respublika Prezidenti sifatida mas’uliyatni o‘z zimmasiga olganini ta’kidlagan.

“Yana bir savol tug‘ilishi mumkin, nima uchun Prezident bizni hozirgi milliy inqirozga olib kelgan siyosiy voqealarga ta’sir qila olmadi? Muammolarimizning bir qismi amaldagi Asosiy qonundan kelib chiqadi. Bizda paradoksal holat mavjudki, Prezident davlatchilikning kafolati bo‘lishi kerak, aslida hech qanday vosita yo‘q. Konstitutsiya, shuningdek, bir institutning boshqasidan ustunligini o‘z zimmasiga oladi, taniqli diaspora mutaxassislarining tarixiy vatani davlat institutlarini boshqarishda ishtirok etishiga to‘sqinlik qiladi”, degan Sarkisyan.

2015 yilgi konstitutsiyaviy referendumdan so‘ng Armaniston parlamentli respublikaga aylandi. Armaniston Prezidenti mamlakat Milliy Assambleyasi tomonidan yetti yil muddatga saylanadi.

Sarkisyan 2018 yil martda Prezident etib saylangan.

Armaniston Konstitutsiyasiga ko‘ra, navbatdan tashqari prezidentlik saylovlari fevral oyining o‘rtalarida o‘tkazilishi mumkin. Bir odam faqat bir marta prezidentlikka saylanishi mumkin.