Andijonda 3 ta mashina ishtirokida “avariya” yuz berdi

Andijon viloyati Asaka tumanida 3 ta mashina ishtirokida yo‘l-transport hodisasi sodir bo‘ldi. Bu haqda viloyat Yo‘l harakati xavfsizligi boshqarmasi Axborot xizmati xabar berdi.

Qayd etilishicha, joriy yilning 20 iyun kuni soat 16:00 larda Asaka tumani "Fayzobod" MFY Fayzobod ko‘chasidan o‘tgan 4R-112 avtomobil yo‘lida 3 ta mashina ishtirokida yo‘l-transport hodisasi yuz bergan. Haydovchi U.B. o‘zining Malibu-2 rusumli mashinasini boshqarib kelayotib, oldidan harakatlanib kelayotgan, haydovchi O‘.A. boshqaruvida bo‘lgan Damas rusumli mashina bilan to‘qnashuv sodir etadi. So‘ng yo‘l chetida to‘xtab turgan haydovchi A.N. boshqaruvida bo‘lgan Lacetti rusumli avtomashinaga borib uriladi.

To‘qnashuv oqibatida 3 ta avtomashina texnik shikastlangan. Damas avtomashinasi yo‘lovchisi 2009 yilda tug‘ilgan Yu.M. tan-jarohati olib shifoxonaga yotqizilgan.

"Hozirda mazkur holat yuzasidan Asaka tumani Ichki ishlar boshqarmasi YHX ma’sul xodimlari tomonidan surishtiruv ishlari olib borilmoqda", deyiladi xabarda

Eslatib o‘tamiz, joriy yilning 19 iyun kuni soat 16:30 larda Toshkent shahrining Shayxontohur tumani Qoratosh ko‘chasida 5 ta avtomobil ishtirokida yo‘l-transport hodisasi sodir bo‘lgan edi.