Andijonda harakatlanib ketayotgan Damas yonib ketdi

Andijon viloyatida harakatlanib ketayotgan Damas rusumli avtomobil dvigatelda bo‘lgan qisqa tutashuv oqibatida yonib ketdi. Bu haqda Ichki ishlar vazirligi Jamoat xavfsizligi departamenti Yo‘l harakati xavfsizligi xizmati Matbuot xizmati xabar berdi. 

Qayd etilishicha, hodisa bugun, 26 yanvar kuni soat 09:20 larda Xo‘jaobod tumani hududidan o‘tuvchi A-373 avtomobil yo‘lining 450-kilometrida sodir bo‘lgan. 

Ma’lum qilinishicha, 1974 yilda tug‘ilgan A.M. Damas rusumli avtomobilda harakatlanib kelayotgan vaqtida dvigatelda qisqa tutashuv sodir bo‘lgan. Shu bois haydovchi avtomobilni zudlik bilan to‘xtatgan. Dvigateldagi tutashuv oqibatida yong‘in yuzaga kelgan.

Yong‘in o‘t o‘chiruvchilar tomonidan o‘chirilgan, tan jarohati olganlar esa yo‘q. 

Mazkur hodisa yuzasidan tuman Favqulodda vaziyatlar boshqarmasi va YHXB xodimlari tomonidan surishtiruv olib borilmoqda.