Aliyev uch yil ichida Qorabog‘ni qanday egallaganini aytib berdi

Turkiy davlatlar tashkilotiga a’zo mamlakatlar o‘rtasida xavfsizlik, mudofaa, mudofaa sanoati kabi sohalardagi hamkorlikni yanada oshirish kerak. Bu haqda Tashkilotning Ostonada bo‘lib o‘tgan 10-sammitida Ozarbayjon Prezidenti Ilhom Aliyev so‘z ochdi. 

“Afsuski, bugungi kunda dunyoning turli mintaqalarida xalqaro huquq normalari qo‘pol ravishda buzilmoqda. Urushlar, qonli to‘qnashuvlar boshlanadi. Bunda xavfsizlikning asosiy kafolati, birinchi navbatda, mamlakatlarning mudofaa salohiyatiga aylanadi. A’zo davlatlar o‘rtasida xavfsizlik, mudofaa,  mudofaa sanoati kabi sohalardagi hamkorlikni yanada oshirish kerak, deb hisoblayman”, deydi Aliyev. 

Uning qayd etishicha, Armaniston 30 yilga yaqin Ozarbayjon yerlarini bosib olib, u yerda noqonuniy uydirma tuzum yaratdi. Armaniston tomonidan olib borilgan etnik tozalash oqibatida bir milliondan ortiq ozarbayjonliklar o‘z ota-bobolari zaminidan quvilgan. Armaniston shahar va qishloqlarni yer bilan yakson qildi, tarixiy va diniy yodgorliklarni vayron qildi, buzdi. 

“Bu yillar davomida Ozarbayjon mojaroni tinch yo‘l bilan hal qilishga intildi. Biroq, Armanistonning maqsadi bosqinchilikka asoslangan status-kvoni mustahkamlash edi. 

Armaniston Bosh vazirining 2019 yilda o‘sha paytda bosib olingan Xonkendi shahrida “Qorabog‘ Armanistondir, nuqta” degan bayonoti muzokaralarga nuqta qo‘ydi. Armaniston rahbariyati Ozarbayjonga “yangi hududlar uchun yangi urush” bilan tahdid qilgan edi. 

Armaniston rahbariyatining 2020 yildagi provokatsion harakatlari va bayonotlari, jumladan, harbiy provokatsiyalar Ikkinchi Qorabog‘ urushini muqarrar qilib qo‘ydi”, deydi Aliyev. 

Uning bildirishicha, 2020 yilgi 44 kunlik Vatan urushida Ozarbayjon BMT Nizomining 51-moddasiga asosan o‘zini himoya qilish huquqidan foydalangan holda Armanistonni jang maydonida mag‘lub etib, hududiy yaxlitligi va tarixiy adolatni tiklagan. 

“Qolgan 27 yil davomida Ozarbayjonning bosib olingan hududlaridan Armaniston qurolli kuchlarini olib chiqishni talab qilgan BMT Xavfsizlik Kengashining to‘rtta rezolyutsiyasining qog‘ozda bajarilishini o‘zimiz ta’minladik. Atigi 44 kun davom etgan Ikkinchi Qorabog‘ urushining natijasi 2020 yil 10 noyabrda Armaniston tomonidan taslim bo‘lish to‘g‘risidagi aktning imzolanishi bo‘ldi”, deydi u. 

Prezidentga ko‘ra, Armanistonning Ozarbayjonga nisbatan bosqinchilik va etnik tozalash siyosatiga qaramay, aynan Baku Yerevan bilan tinchlik shartnomasini imzolashga tayyorligini ma’lum qilgan va besh asosiy tamoyilni taqdim etgan. 

“Armaniston 2022 yilda Ozarbayjonning suvereniteti va hududiy yaxlitligini tan olganini e’lon qilgan bo‘lsa-da, uning amaldagi harakatlari mutlaqo mantiqsiz va ziddiyatli edi. Arman armiyasining qoldiqlari Ozarbayjonning suveren hududida bo‘lishda davom etdi. Joriy yilning 2 sentyabr kuni Armaniston Bosh vazirining soxta shaxsni “mustaqillik” bilan tabriklagani, 9 sentyabrda Qorabog‘da bo‘lib o‘tgan “prezidentlik saylovlari” esa mamlakatimizning hududiy yaxlitligi va suverenitetiga hurmatsizlik va to‘g‘ridan-to‘g‘ri tahdid edi”, deydi Aliyev.  

Aliyevning afsus bilan bildirishicha, joriy yilning 19 sentyabr kuni noqonuniy arman qurolli guruhlari tomonidan ozod qilingan yerlarga ataylab o‘rnatilgan mina portlashlari 6 nafar tinch aholi va politsiya xodimining hayotiga zomin bo‘lgan. Shundan so‘ng Ozarbayjon o‘zining konstitutsiyaviy tuzumini tiklash va noqonuniy qurolli guruhlarni zararsizlantirish maqsadida mahalliy aksilterror tadbirlarini amalga oshirgan. 23 soat ichida yakunlangan operatsiya natijasida Ozarbayjon o‘z suvereniteti va konstitutsiyaviy tuzumini to‘liq tiklagan. Aksilterror choralari natijasida tinch aholiga va fuqarolik infratuzilmasiga hech qanday zarar yetmagan. Ozarbayjon xalqaro insonparvarlik huquqiga to‘liq rioya qilgan holda harakat qilgan. Bu faktlarni mintaqaga ikki marta tashrif buyurgan BMT vakillari ham tasdiqlagan.