AQSHda 18 kilogrammlik mushuk qutqarib qolindi

AQSH Virjiniya shtatidagi Richmond shahrida dunyodagi eng semiz mushuklardan biri qutqarib olindi. Bu haqda “Mirror” nashri xabar berdi.

Patchi ismli uy hayvonining vazni 18,3 kg ni tashkil qiladi. Mahalliy hayvonlar nazorati agentligining aytishicha, mushukdagi ortiqcha vaznga uning oldingi egalari aybdor. Mushukning ortiqcha vaznga ega bo‘lishiga turli nosog‘lom ovqatlar bilan to‘ydirilishi sabab qilib olingan. Patchining mahalliy hayvonlar boshpanasiga qanday kelib qolgani ma’lum emas, ammo u kelishi bilanoq kuchli parhez tizimiga o‘tkazilgan. Hayvonlarni nazorat qilish agentligi ijtimoiy tarmoqlardan birida mushuk uchun yangi uy izlash haqida e’lon bergan. Tez orada mushuk tarmoqda yulduzga aylanib, u haqidagi post yuzlab sharhlarni to‘pladi.

Mushukning yangi egasi chiqib, uni o‘z uyiga olib ketish uchun 2 kishini jalb qildi. Agentlik tomonidan yangi xo‘jayiniga mushukni sog‘lom turmush tarzida parvarish qilish buyurilgan.

Ma’lumot uchun, dnyodagi eng semiz mushuk avval avstraliyalik Ximmi ismli mushuk hisoblangan. Uning vazni 21,3 kg edi. Hayvon 1986 yilda o‘n yoshida vafot etgan. Dunyo bo‘ylab mushuklarga nisbatan e’tibor katta. Xususan, Malayziyada mushuklarga milliy kiyim kiyish tendensiyasi mavjud. Mahalliy aholi Mahizan Qosim o‘z mushuklariga shunday liboslar kiydira boshlaganidan keyin butun mamlakat bo‘ylab bu tendensiya mashhur bo‘lib ketgan. Hatto to‘rt oyoqli kiyimlarga ixtisoslashgan tikuvchilar va mushuk kiyimlari sotiladigan maxsus do‘konlar ham paydo bo‘la boshlagan.