AQSH o‘zga sayyoraliklar haqidagi dalillarni yashirib kelgan - sobiq razvedka xodimi

Sobiq razvedka xodimining Qo‘shma Shtatlar hukumati o‘nlab yillar davomida Yerdan tashqaridagi hayotning dalillarini topib, yashirib kelgani haqida guvohlik berdi. Bu haqda “Smithsonian magazine” nashri xabar berdi.

Guvoh Devid Grush Vakillar palatasida noma’lum uchar jism (NUJ)lar haqidagi tinglovda Pentagon halokatga uchragan transport vositalari va “insonga tegishli bo‘lmagan” biologik qoldiqlarni topib olganini da’vo qildi. Uning so‘zlariga ko‘ra, mamlakat hukumati uzoq yillardan beri o‘zga sayyoraliklarning mavjudligi haqida xabardor bo‘lgan va buni yashirib kelgan.

“Mening guvohligim ushbu mamlakatga xizmat ko‘rsatish bo‘yicha uzoq yillik tajribaga ega bo‘lgan shaxslar tomonidan menga berilgan qonuniy ma’lumotlarga asoslanadi. Ularning ko‘pchiligi fotosuratlar, rasmiy hujjatlar va maxfiy og‘zaki guvohliklar shaklida ishonchli dalillarni o‘z ichiga oladi”, dedi u majlisda.

Bu 60 yillik tanaffusdan so‘ng Kongressning NUJlar bo‘yicha o‘tkazgan ikkinchi tinglovidir. Shunga qaramay, hech bir eshitish Yerdan tashqarida hayot borligi haqida aniq dalillarni ochib bermadi. Grushning aytishicha, u hech qanday NUJga shaxsan guvoh bo‘lmagan va xavfsizlik bilan bog‘liq muammolarni keltirib, o‘z da’volarining ba’zi tafsilotlari bo‘yicha aniq ma’lumot berishdan bosh tortgan. 

“Men sobiq razvedka xodimi sifatida maxfiy ma’lumotlarni oshkor qilganim uchun qamoqqa tushaman”, dedi u barcha tavsilotlarni ochiqlay olmasligining sababini tushuntirar ekan.

Eslatib o‘tamiz, o‘tgan oyda AQSH Kongressi Vakillar palatasi qo‘mitasining a’zosi Tim Burchett ham o‘zga sayyoraliklarning Yerga kelganiga bir asrdan oshgani, shuncha vaqtdan buyon esa ma’lumotlar yashirilib kelinayotganini aytgandi.