43-o‘lim: 56 yashar ayol koronavirusdan vafot etdi

Qoraqalpog‘istonda koronavirusga chalingan 56 yashar bemor muolajalarga qaramay vafot etdi. 

Nukus shahrida yashovchi 56 yoshli Z.D. (ayol)da joriy yil 23 iyun kuni bosh og‘rig‘i, tana haroratining ko‘tarilishi, yo‘tal, burundan suv oqishi, aksirish, qaltirash va ishtahaning yo‘qolishi kuzatilgan. Bemor hech kimga murojaat qilmasdan uyida o‘zi davolangan.

29 iyun kuni esa tana harorati tushmaganligi sababli tez tibbiy yordam mashinasida Respublika yuqumli kasalliklar shifoxonasiga olib borilgan va izolyatorga joylashtirilgan. 

Shu kuni COVID-19 infeksiyasiga namuna olingan va unda ushbu kasallik tasdiqlangan.
Respublika yuqumli kasalliklar shifoxonasida unga COVID-19 infeksiyasining og‘ir kechishi, shuningdek, ikki tomonlama pnevmoniya, nafas yetishmovchiligining 3-darajasi, yurak qon-tomir yetishmovchiligining 3-darajasi, o‘tkir respirator distress sindromi tashxisi kuyilgan.

Bemor bir necha yil davomida gipertoniya, yurak ishemik kasalligi bilan davolanib yurgan va nazoratda turgan. Bundan tashqari, u zo‘riqish stenokardiyasi, gipertoniya kasalligining 3-darajasi, arterial gipertenziyaning 3-darajasi, qandli diabetning 2-turi, semizlikning 2-darajasidan ham davolanib kelgan.
Shifoxonada bemor bir necha marta Sog‘liqni saqlash vazirligi mutaxassislari tomonidan onlayn konsultatsiya qilingan, davolash jarayoni ularning tavsiyasi asosida olib borilgan.

Shifokorlar tomonidan standartlar asosida o‘tkazilgan reanimatsion muolajalarga qaramasdan bemor o‘tkir yurak qon-tomir va nafas yetishmovchiligidan vafot etdi.