4 yashar bola dunyodagi eng aqllilar tashkilotiga a’zo bo‘ldi

Ikki yoshligidayoq o‘zi mustaqil o‘qishni o‘rgangan bola Buyuk Britaniyaning Mensa tashkilotining eng yosh a’zosi sifatida qabul qilindi. Bu haqda BBC xabar berdi.

Qayd etilishicha, Britaniyaning Portisxed shahrida yashovchi to‘rt yoshli Teddi ona tilidan tashqari, oltita tilda, jumladan, mandarin tili (Xitoyda aksariyat aholi so‘zlashadigan rasmiy til)da 100 gacha sanay oladi. Teddining onasi Bet Xobbsning aytishicha, u atigi 26 oyligida bolalar telekanallarini tomosha qilish va harflarning tovushlariga taqlid qilish orqali o‘qishni o‘rgangan.

“U yozuvlarni kuzatishni boshladi va shuning uchun biz uni pandemiyadan keyin bolalar bog‘chasiga yubordik. Bizga bolalar bog‘chasidan qo‘ng‘iroq qilishdi va u o‘qiy olishini aytishdi”, deydi Teddining onasi Bet Xobbs.

Aynan shu narsa Teddining ota-onasini hayratda qoldirgan. U planshetida o‘ynab, notanish tovushlarni chiqara boshlagan. Boladan bu nima ekanini so‘rashganida, u “Ona, men mandarin tilida sanayapman”, deb javob bergan.

Shundan so‘ng undan Mensa tashkiloti tomonidan tasdiqlangan razvedka testini olib ko‘rishgan. Bu sinovda u 98 foizdan yuqori ball to‘plab, tashkilotga qabul qilingan.

Ma’lumot uchun, Mensa dunyodagi eng katta va eng qadimgi yuqori IQ jamiyatidir. Bu notijorat tashkilot bo‘lib, insoniyat manfaati uchun inson aql-zakovatini aniqlash va rivojlantirish, intellektning tabiati, xususiyatlari va foydalanish bo‘yicha tadqiqotlarni rag‘batlantirish va o‘z a’zolari uchun rag‘batlantiruvchi intellektual va ijtimoiy muhitni ta’minlash bilan shug‘ullanadi.

Alibek Beyjanov