Hujumda nima qilishni bilmadik – Xavi 

Yevropa ligasining chorak final javob uchrashuvida “Ayntraxt”ga qarshi saf tortgan “Barselona” hujumda qanday harakatlanish kerakligini tushunmadi. “Ko‘k anorranglilar” ustozi Xavi “Marca” nashriga bergan intervyusida shunday dedi.

“Bizning qahramonligimiz yetarli emas edi. Mag‘lubiyatga uchradik, ammo farqni bitta golgacha qisqartirishga muvaffaq bo‘ldik. Biz yaxshi o‘ynamadik va hujumda nima qilishimiz kerakligini bilmadik. Futbolchilarim o‘yinni nazorat qildi, ammo bu yetarli emas edi. Yevrokuboklarda yo‘l qo‘ygan xatolaringiz uchun badal to‘lashingiz kerak. Endi bor e’tiborimizni Ispaniya chempionatga qaratamiz. G‘alaba qozonishga harakat qildik. Biz buni muvaffaqiyatsizlik sifatida qabul qilmaymiz. Lekin juda xafaman, endigi maqsadimiz Yevropa Chempionlar ligasiga chiqish”, degan Xavi.

Ma’lumot o‘rnida, ikki o‘yin natijasiga ko‘ra, “Ayntraxt”ga 4-3 hisobida imkoniyatni boy bergan “Barselona” Yevropa ligasidagi ishtirokini chorak finalda tugatdi.

Shuningdek, kecha 14 aprel kuni YeLning barcha yarim final juftliklari ma’lum bo‘ldi. Yarim finalda Germaniyaning “Leypsig”  klubi Shotlandiyaning “Reynjers” jamoasi bilan bahslashadi. “Barselona”ni mag‘lub qilib, “shovqin” ko‘targan “Ayntraxt” Angliyaning “Vest Xem” jamoasi bilan kuch sinashadi. Yarim final uchrashuvlari 28 aprel va 5 may sanasiga belgilangan.

Ma’ruf Abdumalikov