Hindistonda motam. Afsonaviy “Bollivud bulbuli” vafot etdi

1 000 dan ortiq Bollivud filmlarida saundtrek kuylagan afsonaviy hind yulduzi Lata Mangeshkar bugun, 6 fevral kuni 92 yoshida vafot etdi. 

Unga joriy yil yanvar oyida COVID-19 tashxisi qo‘yilib, Mumbaydagi shifoxonaga joylashtirilgan edi. Uning ahvolidan xabardor bo‘lib turgan doktorning so‘zlariga ko‘ra, san’atkor ichki a’zolarida yuzaga kelgan faoliyat buzilishi oqibatida vafot etgan.

Bollivud filmlaridagi ayollar nomidan qo‘shiq kuylab kelgan xonanda, 50 yillik faoliyati davomida 36 ta tilda 30 000 ortiq qo‘shiq ijro etgan. 

Hind kino sanoatidagi Bollivud filmlarida kuylagan qo‘shiqlari, xonandani “millat ramzi” sifatida tanilishiga xizmat qilgan. 

Afsonaviy san’atkor o‘limi sababli Hindistonda bugundan boshlab ikki kunlik motam e’lon qilindi. Shu davr mobaynida mamlakat bo‘ylab davlat milliy bayrog‘i pastga tushiriladi. 

Uning dafn marosimi bugun, 6 fevral kuni kechqurun hukumat tominidan Mumbayda tashkillashtiriladi. 

“Bollivud bulbuli” o‘limi ortidan Hindiston Prezidenti Ram Nat Kovind ham ta’ziya bildirgan. 

Mamalakat Bosh vaziri Narendra Modi esa Mangeshkarning vafotiga "millat tarixida to‘ldirib bo‘lmaydigan bo‘shliq", deya munosabat bildirgan.