Hindistonda egizak minoralar portlatib yuborildi (video)

Kecha, 28 avgust kuni Hindistonning Noyda shahrida noqonuniy qurilgan ikkita osmono‘par bino portlatib yuborildi. Bu haqda “Financial Express” nashri xabar bermoqda.

Hindistondagi 103 metrli egizak minoralarini buzish operatsiyasi taxminan 9 soniya davom etgan. Binolarni portlatish uchun 3700 kilogrammdan ortiq portlovchi moddalar ishlatilgan.

Qayd etilishicha, osmono‘par binolar Hindistonda buzib tashlangan eng katta inshootlar hisoblanadi.

Operatsiya oldidan hududdan 5 mingga yaqin odam evakuatsiya qilingan, qo‘shni uylar qalin plyonka bilan qoplangan. Politsiya hududni o‘rab olib, bir qancha yo‘llarni to‘sib qo‘ygan.

Ma’lum bo‘lishicha, ushbu binolarning qonuniyligi bo‘yicha sud jarayonlari 9 yil davom etgan. Sud qaroriga ko‘ra, quruvchilar osmono‘par binolar orasidagi minimal masofa me’yorlarini buzgan. 2021 yil avgust oyida Hindiston Oliy sudi binoni buzishga qaror chiqargan.

Farangiz Salimova