Hafta oxirida ob-havo qanday bo‘lishi aytildi

Gidrometeorologiya xizmati markazi joriy hafta oxirida O‘zbekiston ahlini qanday ob-havo kutayotgani haqida ma’lumot berdi.

Qayd etilishicha, ertaga, 21 mart kuni Navro‘z bayram kunida kun davomida respublikada yomg‘ir yog‘adi, faqat shimoli-sharqiy tumanlarda yog‘ingarchilik bo‘lmaydi. O‘zbekistonning barcha hududlarida kunduzgi havo harorati +18...+23 darajani tashkil qiladi, bu me’yordan 2-3 darajaga yuqori. Shamolning tezligi 15-20 m/s gacha kuchayishi mumkin. Toshkent shahrida kechasi va kunning birinchi yarmida yomg‘ir yog‘adi. Shamol 5-10 m/s tezlikda esadi, 12-17 m/s gacha kuchayishi mumkin. Harorat kechasi 14...+16 daraja, kunduzi +18...+20 darajani tashkil qiladi.

Dam olish kunida nam havo oqimi O‘zbekiston hududidan chiqib ketadi. Ob-havo yog‘ingarchiliksiz bo‘ladi, harorat kechasi +10...+15 daraja, kunduzi +20...+25 daraja bo‘ladi, bu yilning shu davri uchun xos bo‘lgan me’yoriy qiymatlardan 4-5 darajaga yuqoridir.

O‘zgidromet sinoptiklari O‘zbekiston xalqini Navruz ayyomi bilan tabriklab, sog‘lik salomatlik, tinchlik-xotirjamlik va farovonlik tilab qolgan.