Жапаров Путиннинг ҳузурига борди

Кеча, 23 апрель куни Россия Президенти Владимир Путин Кремль саройида Қирғизистон Республикаси Президенти Садир Жапаров билан учрашди. Бу ҳақда Президент матбуот хизмати хабар қилди.

Учрашувда Путин мамлакатлараро алоқалар ҳар доимгидан ҳам яхшиланаётганини қайд этган.

“Ташриф буюрганингиз учун катта раҳмат. Мен, сиз ўз юртингизда бизни, бутун делегациямизни қандай меҳмондўстлик билан кутиб олганингизни эслайман. Ўшанда жуда самарали ишлаган эдик. Шуни таъкидлашни истардимки, барча келишувларимиз бажарилмоқда. Ҳар икки томондаги жамоалар фаол ва жадал ишламоқда. Бу ишларнинг натижалари эса, Қирғизистон иқтисодий ўсиш суръатларида ўз аксини топмоқда”, деган Россия Президенти.

Шунингдек у, Жапаровнинг ушбу ташрифи икки томонлама муносабатларни ривожлантиришга хизмат қилишини таъкидлаган.

“Сизни кўриб турганимдан жуда хурсандман. Хуш келибсиз!”, деган Путин.

Жапаров эса, икки мамлакатни тарихий дўстлик ришталари боғлашини айтиб, Қирғизистон Россия Федерациясининг стратегик ҳамкори ва асосий иттифоқчиси бўлиб келганини ва шундай бўлиб қолишини алоҳида келтириб ўтган. Шунингдек, Жапаров Путинни жорий йилнинг август–сентябрь ойида Бишкекда ўтказиладиган Шанхай ҳамкорлик ташкилоти саммитига таклиф қилган.

“Раҳмат, Владимир Владимирович, илиқ кутиб олганингиз учун. Ушбу ишчи учрашувга рози бўлганингиз учун сизга миннатдорчилик билдираман.

Маълумки, биз, сиз билан бир қатор халқаро ташкилотларда, жумладан, Шанхай ҳамкорлик ташкилотида (ШҲТ) фаол аъзомиз. Жорий йилнинг 31 август ва 1 сентябрь кунлари Бишкек шаҳрида ШҲТ саммити бўлиб ўтади. Шу муносабат билан сизнинг ташрифингизни ва саммитдаги иштирокингизни интиқлик билан кутмоқдамиз. Ҳозир эса, икки томонлама масалаларни муҳокама қилиш учун яхши имконият мавжуд. Умид қиламанки, биз ўзаро манфаатли шартлар асосида ҳамкорлигимизнинг кўплаб йўналишлари бўйича фикр алмашамиз. Яна бир бор илиқ қабул учун раҳмат”, деган Қирғизистон Президенти.

Эслатиб ўтамиз, аввалроқ Қирғизистон Президенти Садир Жапаров Россия Федерацияси Қирғизистон учун стратегик иттифоқчи, ҳамкор ва дўст бўлиб келган ва шундай бўлиб қолишини маълум қилганди.