Жаҳон чемпионатининг расмий постери тақдим этилди

Халқаро футбол федерацияси (FIFA) ўзининг расмий веб-сайтида АҚШ, Мексика ва Канадада бўлиб ўтадиган 2026 йилги Жаҳон чемпионатининг расмий постерини тақдим этди.

Афишада тўп тепаётган футболчининг оқ силуэти акс этган бўлиб, унинг қиёфасида турнир мезбонлари – Канада, Мексика ва АҚШ ҳудудлари рамзий тарзда мужассамланган. Фон уч рангда безатилган: Канада учун қизил, Мексика учун яшил ва АҚШ учун кўк. Шунингдек, унда мухлислар тасвири ҳамда ҳар уч мамлакатнинг миллий рамзлари жой олган.

Таъкидланишича, Жаҳон чемпионати тарихида илк бор расмий постер уч нафар рассом ҳамкорлигида яратилган. Улар – канадалик Карсон Тинг, мексикалик Минерва GM ва америкалик Хэнк Уиллис Томас.

“Расмий турнир афишаси ушбу ноёб лаҳзанинг ҳамкорлик, ҳаяжон ва бирдамлик руҳини улуғлайди. Жаҳон чемпионати тарихида биринчи марта уч рассом бирлашиб, расмий постер яратди. Улар ўз истеъдоди ва бадиий услубларини уйғунлаштириб, футболга бўлган умумий иштиёқ дунёни қандай бирлаштиришини акс эттирувчи асар яратдилар”, дейилади расмий хабарда.

Шунингдек, FIFA турнир ўйинларига мезбонлик қиладиган 16 та шаҳарнинг расмий плакатларини ҳам эълон қилган.

“Ушбу санъат асарлари тўплами Жаҳон чемпионати мезбон шаҳарларига бағишланган расмий плакатларнинг илк серияси сифатида тарихга киради”, дея маълум қилди ташкилот.

Маълумот учун, 2026 йилги Жаҳон чемпионати 11 июндан 19 июлгача давом этади.

Эслатиб ўтамиз, аввалроқ Эрон ва АҚШ ўртасидаги кескинликлардан сўнг, Эрон Футбол федерацияси президенти Меҳди Тож Эрон терма жамоаси 2026 йилги футбол бўйича Жаҳон чемпионатида иштирок этмаслигини маълум қилганди.