Зеленский Путинни музокаралар столига ўтиришга мажбурламоқчи

Украина Президенти Владимир Зеленский Россияга етказилган йўқотишлар ва уларнинг ҳарбий салоҳиятининг камайиши мамлакатни чинакам дипломатияга қайтишга мажбур қилиши керак, деб ҳисобламоқда. Бу ҳақда у Литванинг Вильнюс шаҳрида бўлиб ўтган “Бухарест тўққизлиги” саммитида сўз очди.

“Бу айни бир ўзига хос давр. Бир томондан, Россия ёзги ҳужумини бошлади, бироқ бошқа томондан – у дипломатияда иштирок этишга мажбур. Бу эса бир вақтнинг ўзида ҳам чақириқ, ҳам имконият. Бу урушни якунлаш учун имкон”, деган Зеленский.

Президентнинг сўзларига кўра, Украина учун энг асосий устувор вазифа – ўз мудофаасини мустаҳкамлаш. У, хусусан, ҳарбий ёрдам пакетлари ва Украина ҳамда иттифоқчи давлатларда қурол ишлаб чиқаришга инвестициялар учун миннатдорлик билдирган.

“Европа ва АҚШ Россияга қараганда яхшироқ қуролларга эга. Шунингдек, бизда кучлироқ тактик қарорлар бор. Бизнинг “Ўргимчак тўри” операциямиз буни исботлади. Россия йўқотишлар нимани англатишини тушуниши керак. Айнан мана шу уни дипломатияга ундайди”, деган Зеленский.

Шунингдек, у Россиянинг ҳарбий йўқотишлари фақат Украинани эмас, балки бутун Европани ҳимоя қилишини таъкидлаган.

“Разведкаларингиздан сўранг – Россия бу ёзда Беларусда нима режалаштиряпти? Агар улар у ердан ҳужумларга тайёр бўлишга журъат қилаётган бўлса, демак, биз биргаликда кучимизни оширишимиз керак”, деган Украина раҳбари.

Шунингдек, Зеленский Украина урушни тўхтатиш ва унинг кенгайишига йўл қўймаслик учун кучайтирилиши зарурлигини айтган. У қурол ишлаб чиқариш муҳимлигини алоҳида урғулаган.

“Украина ўз эҳтиёжининг 40 фоизини ички қурол ишлаб чиқариш орқали қоплашга қодир. Бироқ бу барқарор молиялаштиришни талаб қилади”, деган Зеленский.

Шунингдек, у “Ўргимчак тўри” операцияси айниқса дронлар ишлаб чиқаришга қилинган сармоянинг қандай натижа беришини очиқ кўрсатганини айтиб ўтган.

“Биз зудлик билан ҳаво ҳужумидан мудофаа тизимларини, айниқса Patriot комплекслари ва уларга ракеталарни кучайтиришимиз керак. Бу борада қарорлар зарур”, дея қўшимча қилган Зеленский.

Украинанинг йирик операцияси

Украина кеча, 1 июнь куни Россия ҳарбий аэродромларига учувчисиз учоқ ёрдамида амалга оширилган йирик ҳужум – “Ўргимчак тўри” операциясини ўтказди. Украина Президенти Владимир Зеленский 1 июнь куни кечки мурожаатида операциясида иштирок этганларга миннатдорлик билдирди.

Киевнинг ҳисоб-китобларига кўра, ушбу операция натижасида зарар кўрган самолётнинг тахминий умумий қиймати 7 миллиард долларни ташкил қилади. Манбалар Россиянинг 41 та самолётига, жумладан, стратегик A-50, Tu-95 ва Tu-22M3 самолётларига зарар етказилгани ҳақида хабар берган. Киевга кўра, улардан мунтазам равишда Украина шаҳарларига ҳужум қилиш учун фойдаланилган. 

“Deutsche Welle” манбасига кўра, Иркутск вилоятидаги Белая, Рязан вилоятидаги Дягилево, Мурманск вилоятидаги Оленя ва Иваново вилоятидаги Иваново авиабазасига ҳужум қилинган. Зарар кўрган самолётлар ҳақидаги маълумотларни тасдиқлашнинг иложи йўқ.

Россия Мудофаа вазирлиги тўртта ҳудуддаги, шунингдек, Амур вилоятидаги аэродромларга ҳужум қилинганини тасдиқлаган. Россия ҳарбийларига кўра, ҳужумлар Иваново, Рязан ва Амур вилоятларида қайтарилган. Мурманск ва Иркутск вилоятларида “бир нечта самолёт бўлинмалари ёниб кетган”.