Япония маликаси 101 ёшида вафот этди

Япония императорлик оиласининг энг кекса аъзоси малика Юрико Микаса 101 ёшида вафот этди. Бу ҳақда императорлик маиший идорасига таяниб, NHK хабар берди.  

Аниқлик киритилишича, малика Юрико жорий йилнинг 3 март кунидан бери Токио клиникаларидан бирида шифокорлар томонидан қўйилган инсульт ва аспирацион пневмония белгилари билан даволанаётган эди.

4 июнь куни Юрико Микаса ўзининг 101 ёшини нишонлаган. NHK телеканалининг қайд этишича, малика ўлими унинг турмуш ўртоғи шаҳзода Такаҳитонинг саккиз йил аввал вафот этганидан бери император оиласида биринчи йўқотиш бўлган. Малика Юрико вафотидан кейин император оиласида 16 киши қолди.

Маълумот учун, малика Микаса турли хайрия ташкилотларининг, айниқса анъанавий япон маданиятини сақлаш билан шуғулланадиган ташкилотларнинг фахрий президенти эди. Шунингдек, у Япония Қизил Хоч жамиятида фаол роль ўйнаган. Микаса шаҳзода Такаҳитонинг беваси, император Хирохитонинг синглиси ва ҳозирги монарх Нарухитонинг бувиси эди. 1948 йилда малика “Imperial Gift” жамғармасининг президенти бўлди, у 2010 йил сентябрь ойида истеъфога чиққанди. Малика 1999 йилда илк бор юрак стимулятори ишлатган. У 2019 йилда император Нарухитонинг тахтга ўтириш маросимида иштирок этмаган. 2020 йил сентябрь ойида императорликнинг 97 ёшли вакиласи юрак етишмовчилиги ва пневмония белгилари билан касалхонага ётқизилган, аммо икки ҳафтадан сўнг унга жавоб берилган.

Эслатиб ўтамиз, аввалроқ Буюк Британия қироличаси Елизавета II 96 ёшида вафот этгани хабар қилинганди. Унинг жасади Эдинбургдаги саройга жойлаштирилганди.