Эркинликни ҳам меъёри бўлади – Мирзиёев ЙПХ ходимларини уриб, сўкишаётганига ечим топишни буюрди

Сўнгги пайтларда Ўзбекистонда йўл ҳаракати хавфсизлиги инспектори фаолиятига қаршилик кўрсатиш, уларни обрўсизлантириш ҳолатлари кўпаймоқда. Ўзбекистон Президенти Шавкат Мирзиёев бугун, 11 февраль куни бўлиб ўтган йиғилишда шу масалага эътибор қаратди.

“Сўнгги пайтларда йўл ҳаракати хавфсизлиги инспектори фаолиятига қаршилик кўрсатиш, уларни обрўсизлантириш ҳолатлари кўпаймоқда. Мана интернетда ҳам чиқиб кетяпти, йўл ҳаракати хавфсизлиги инспекторларини уряпти, сўкяпти, ҳақорат қиляпти, машинани устига ҳайдаяпти, унда ҳам мисоллар бўлган Ўзбекистон шароитида. Қонун йўқ. Бечора инспектор нима қилиши керак. Йўқ, биронта одам, биронта депутат “жаноб Президент буни ўзгартирайлик, бу адолатсизлик бўляпти” демаяпти. Эркинликни ҳам меъёри бўлади, бу эркинлик дегани қонунни ҳурмат қилиш дегани. Қонунларни кўриб чиқишда бу масалага ҳам алоҳида эътибор қаратиш зарур”, дейди давлат раҳбари.

Шунингдек, ҳайдовчиларнинг жавобгарлигини мажбурий суғурта қилишда тўланадиган суғурта бадалини жарима балларидан келиб чиқиб белгилаш тартиби жорий этилади. 

Йиғилишда йўл ҳаракати қоидалари анча эскиргани учун халқаро стандартлар асосида янгидан ишлаб чиқилиши ҳақида ҳам кўрсатма берилди.