Вучич тез орада истеъфога чиқишини эълон қилди

Сербия Президенти Александар Вучич “яқин ҳафталарда” истеъфога чиқишини эълон қилди. Бу ҳақда у кеча, 27 июнь куни ўз тарафдорлари олдидаги митингда чиқиш қилаётганда баён этди. 

Вучич унинг истеъфосидан кейин мамлакатда муддатидан олдин парламент ва президентлик сайловлари бўлиб ўтишини алоҳида таъкидлаган. Ушбу сайловлар куздаёқ ўтказилиши кутилмоқда.

Вучич 12 йилдан бери ҳокимиятда қолмоқда ва унинг иккинчи президентлик ваколат муддати 2027 йилнинг ўрталарида якунига етади. Сербия Конституциясига кўра, айни бир шахс икки муддатдан ортиқ президент лавозимини эгаллай олмайди.

Бунгача Вучич ҳокимиятда қолиш учун конституцияни ўзгартириш ниятида эмаслигини билдирган эди. Шунга қарамай, у парламент сайловларида иштирок этишни режалаштираётганини ва мамлакат бош вазири лавозимига ўз номзодини илгари суришдан умидвор эканлигини эълон қилди. Вучич аввал ҳам, 2014–2017 йилларда Сербия ҳукуматига раҳбарлик қилган.

Қайд этиш жоиз, Вучич истеъфога чиқишини бутун мамлакат бўйлаб бир ярим йилдан бери давом этаётган талабаларнинг коррупцияга қарши норозилик намойишлари фонида маълум қилди. Намойишларга Нови-Сад шаҳридаги темир йўл вокзалида бостирманинг қулаб тушиши ва бунинг оқибатида 16 киши ҳалок бўлиши сабаб бўлган эди. 

Талабаларнинг акциялари мунтазам равишда ўнлаб ва ҳатто юз минглаб одамларни бирлаштирмоқда. Намойишчилар Вучич ва унинг атрофидагиларни кенг тарқалган коррупция, уюшган жиноятчилик билан алоқадорлик, сиёсий рақибларга қарши куч ишлатиш ва сўз эркинлигини бўғишда айбламоқда.

Норозилик намойишлари иштирокчиларининг талабларидан бири – муддатидан олдин сайловлар ўтказишдир. Жамоатчилик фикрига кўра, мамлакат аҳолисининг қарийб 80 фоизи талабаларнинг коррупцияга қарши талабларини, яна 64 фоизи эса намойишларнинг ўзини қўллаб-қувватлайди.