Ўзгидромет аҳолига шошилинч огоҳлантириш билан чиқди

Жорий йилнинг 8-9 февраль кунлари А-373 “Тошкент – Ўш” автомобиль йўлининг “Қамчиқ” довонидан ўтган қисмида қор ёғиши, вақти–вақти билан кучли ёғингарчилик, туман кузатилиши, кўринувчанлик 50 метргача пасайиши, шамол тезлиги 15-20 м/с гача кучайиши, автойўлда яхмалак ва қор уюмлари юзага келиши мумкин. Бу ҳақда Гидрометеорология хизмати марказининг  фуқароларга шошилинч огоҳлантиришида айтилган. 

Шунингдек, жорий йил 8-13 февраль кунлари кутилаётган ёғингарчилик ҳамда ҳаво ҳароратининг сезиларли ўзгаришлари сабабли республиканинг тоғли ҳудудларида, жумладан: 

•    Қашқадарё вилояти: Китоб, Шаҳрисабз туманларида;

•    Сурхондарё вилояти: Қумқўрғон, Сариосиё, Узун, Бойсун туманларида;

•    Самарқанд вилояти: Самарқанд, Ургут туманларида;

•    Жиззах вилояти: Зомин, Бахмал туманларида;

•    Тошкент вилояти: Паркент, Оҳангарон, Бўстонлиқ туманларида ва Чотқол тизмасининг “Чимён” тоғларида; 

•    Наманган вилояти: Поп туманида;

•    Фарғона вилояти: Сўх, Фарғона туманларида қор кўчиш хавфи элон қилинади. 

“Тоғли худудларда истиқомат қилувчи фуқаролар, дам олувчилар ҳамда тоғли худудларда ҳаракатланувчи ҳайдовчилардан эҳтиёткорлик чораларини кўришларини сўраймиз”, дейилади хабарда.