Ўзбекистоннинг ЖСТга қўшилиши учун ёрдам кенгайтирилади

Жорий йилнинг 26 октябрь куни Ўзбекистон Республикаси Бош вазирининг ўринбосари – Инвестициялар ва ташқи савдо вазири Сардор Умурзоқов Жаҳон савдо ташкилоти (ЖСТ) Бош директори ўринбосари Сянчэнь Чжан билан учрашув ўтказди.

Учрашув чоғида Ўзбекистоннинг ЖСТга аъзо бўлиши бўйича музокара жараёнининг ҳозирги ҳолати ҳамда бу борадаги ҳамкорлик доирасида навбатдаги тадбирлар муҳокама қилинди.

Ўзбекистон учун ЖСТга аъзо бўлиш мамлакатни кўп томонлама савдо тизимига янада интеграциялашга қаратилган устувор масала ҳисобланади.

Томонлар жорий йил охиригача Ўзбекистоннинг ЖСТга аъзо бўлиши бўйича Ишчи гуруҳнинг 5-йиғилишини ўтказиш бўйича ҳамкорликнинг амалий масалаларини муҳокама қилдилар. Ташкилот раҳбарияти ушбу тадбирни ўтказишда ва умуман Ўзбекистоннинг ЖСТга аъзо бўлиши жараёнида ҳар томонлама қўллаб-қувватлашга тайёр эканлигини билдирди. Зарур ҳужжатларни тайёрлашда ЖСТ Котибияти ва унинг халқаро экспертлари томонидан Ўзбекистонга кўрсатилаётган техник ёрдамни кенгайтириш бўйича келишувга эришилди.