Ўзбекистонлик мигрантларга Санкт-Петербургда курьерлик қилиш ҳам тақиқланди

Россиянинг Санкт-Петербург шаҳрида патент билан ишловчи меҳнат мигрантларига курьер сифатида ишлаш ҳам тақиқланади. Бу ҳақда шаҳар губернатори Александр Бегловнинг жорий йилнинг 28 июль куни қабул қилинган “2025 йил Санкт-Петербург ҳудудида фаолият юритаётган хўжалик юритувчи субъектлар томонидан айрим иқтисодий фаолият турлари бўйича патент асосида меҳнат фаолиятини амалга ошираётган хорижий фуқароларни жалб этишга тақиқ ўрнатиш тўғрисида”ги қарорида сўз боради.

Кеча, 11 август куни ушбу қарорга тегишли ўзгартириш ва қўшимчалар киритилиб, Россияда патент асосида ишловчи мигрантларга курьерлик қилишни тақиқловчи банд қўшилган. Унга кўра, янги чекловлар барча турдаги транспорт воситаларида, жумладан, озиқ-овқат етказиб бериш хизматига ҳам тааллуқли.

Қайд этилишича, бу қарор яширин бандликка қарши курашиш, курьерлик хизматлари сифати ва хавфсизлигини ошириш, шунингдек, Россия фуқаролари, аввало ёшлар ва талабалар учун янги иш ўринлари яратишга қаратилган. Тадбиркорларга якуний тақиқ кучга киргунига қадар уч ойлик мослашиш даври берилади.

Шаҳар ҳокимиятининг таъкидлашича, хорижлик курьерлар сектор бўйича ишлаётганларнинг жуда кичик қисмини ташкил этади ва бу чора етказиб бериш бозорининг барқарор ишлашига таъсир қилмайди. Ушбу қарор расман эълон қилинганидан, яъни жорий йилнинг 11 августидан 10 кун ўтиб кучга киради ва 2025 йил охиригача амал қилади.

Қайд этиш жоиз, Евроосиё иқтисодий иттифоқи шартномасига мувофиқ, Беларусь, Қозоғистон, Арманистон ва Қирғизистон фуқаролари Россияда патент ёки меҳнат рухсатномасисиз ишлаши мумкин. Демак, ушбу тақиқ, асосан, ўзбекистонлик ва тожикистонлик меҳнат мигрантларига тааллуқли.

Эслатиб ўтамиз, аввалроқ Санкт-Петербургда патент асосида ишловчи меҳнат мигрантларига, яъни, асосан, ўзбекистонлик ва тожикистонликларга таксичилик фаолияти билан шуғулланиш тақиқланган эди.