Ўзбекистонга 5,7 млрд сўмлик заргарлик буюмларини олиб кирганлар ушланди

Қирғизистондан Ўзбекистон ҳудудига ноқонуний йўллар билан олиб келинган 5,7 млрд сўмлик заргарлик буюмлари тўхтатиб қолинди. Бу ҳақда Давлат хавфсизлик хизмати хабар берди. 

Маълум қилинишича, ўтказилган тезкор тадбирда Фарғона туманида яшовчи, 1987 йилда туғилган фуқаро қирғизистонлик шахс томонидан айланма йўллар орқали “ўзбек-қирғиз” чегарасидан ноқонуний равишда Ўзбекистонга ўтказиб берилган катта миқдордаги заргарлик буюмларини қабул қилиб олади. 

Шундан сўнг, моддий манфаат эвазига уларни Фарғона шаҳрида кутиб турган Андижон вилояти, Жалақудуқ туманида яшовчи бошқа бир фуқарога етказиб берган вақтида иккаласи ҳам қўлга олинган. 

Тилладан ясалган ушбу заргарлик буюмларининг жами оғирлиги 5 килограмм, 706 граммни ташкил қилиб, дастлабки умумий қиймати 5 млрд 746 млн сўмга тенг.

Билдирилишича, ҳозирда мазкур шахсларга нисбатан терговга қадар текширув ҳаракатлари олиб борилмоқда.

Эслатиб ўтамиз, аввалроқ Қирғизистондан Ўзбекистонга ноқонуний равишда 19 килограммдан ортиқ тилла буюмлар олиб ўтган 2 киши ушланганди.