Ўзбекистонда ноқонуний қурилиш учун жазо кучайтирилмоқда

Ўзбекистонда ноқонуний қурилиш учун жавобгарлик чоралари кучайтирилмоқда. Бу ҳақда бугун, 11 август куни Олий Мажлис Қонунчилик палатасининг навбатдаги мажлисида кўриб чиқилган шаҳарсозлик соҳасида қонунчилик талабларига риоя этилишини таъминлаш, ноқонуний қурилишларнинг олдини олишга қаратилган қонун лойиҳасида сўз боради.

Қонун лойиҳаси билан Шаҳарсозлик кодекси ва “Лицензиялаш, рухсат бериш ва хабардор қилиш тартиб-таомиллари тўғрисида”ги қонунга қатор ўзгартириш ва қўшимчалар киритиш назарда тутилмоқда.

Хусусан, шаҳарсозлик талабларини қўпол равишда бузганлик, яъни ноқонуний қурилишларни амалга ошириш, шунингдек, қурилиш-монтаж ишларини бош режа, мастер-режа ва қурилиш лойиҳаси талабларини бузган ҳолда амалга ошириш, қонунчилик ҳужжатларида белгиланган ҳажмдан катта бўлган иморатлар, бино ва иншоотларни ваколатли органни хабардор этмасдан қуриш, реконструкция қилиш ва капитал таъмирлаш ишлари учун жавобгарлик чоралари кучайтирилмоқда.

Соҳада Урбанизация ва уй-жой бозорини барқарор ривожлантириш миллий қўмитасининг шаҳарларни комплекс ривожлантириш соҳасидаги ваколатлари аниқ белгилаб қўйилмоқда.

Депутатларнинг қайд этишича, мазкур қонун лойиҳасининг қабул қилиниши шаҳарсозлик соҳасининг ҳуқуқий асосларини мустаҳкамлаш, ноқонуний қурилишларни қисқартириш, қурилиш бозорида ҳалол рақобат муҳитини таъминлаш, ер ва кўчмас мулк ресурсларидан самарали фойдаланишга хизмат қилади. Шунингдек, фуқароларнинг кўп квартирали уйлар қурилишига йўналтирилаётган маблағларини ҳимоя қилиш ҳамда аҳоли учун урбанизация тамойиллари асосида хавфсиз ва замонавий шаҳар муҳитини шакллантиришга ҳуқуқий замин яратади.

Муҳокамалар якунида қонун лойиҳаси депутатлар томонидан биринчи ўқишда қабул қилинган.

Эслатиб ўтамиз, аввалроқ Ўзбекистонда кўп квартирали уй-жойларни рухсатсиз қурганлик учун жавобгарлик чораларини кучайтириш назарда тутилаётгани ҳақида хабар берилган эди.