Уруш қачон тугашини АҚШ эмас, Эрон ҳал қилади – ИИҚК

Эрон Ислом инқилоби қўриқчилари корпуси (ИИҚК) АҚШ Президенти Дональд Трампнинг Эрон билан уруш тез орада тугаши ҳақидаги баёнотига кескин муносабат билдирди. Бу ҳақдa “Deutsche Welle” хабар берди.

Кеча 9 март кун эълон қилинган баёнотда ИИҚК уруш қачон якунланишини АҚШ эмас, балки Эрон белгилашини таъкидлаган.

“Уруш қачон тугашини биз ҳал қиламиз. Жанг майдонидаги вазият ва урушнинг якуни Ислом Республикаси қўлида”, дейилади баёнотда.

Бунгача Дональд Трамп уруш кутилганидан анча тез тугаши мумкинлигини, ҳатто уруш деярли тугаганини билдирган. Трампнинг сўзларига кўра, Эроннинг на денгиз флоти, на алоқа тизими, на ҳаво кучлари қолган.

Февраль ойи охирида Трамп уруш тўрт-беш ҳафта давом этиши мумкинлигини айтган эди. Ўтган ҳафта охирида эса Оқ уй матбуот котиби Кэролайн Левитт бу муддатни тўрт-олти ҳафта деб баҳолаган.

Шу билан бирга, Эрон Ташқи ишлар вазири Аббос Ароқчи мамлакати зарур бўлган тақдирда ракета ҳужумларини давом эттиришини маълум қилган.

“Биз уларга ракеталаримиз билан зарба ҳам беришга тайёрмиз”, деган у.

Эслатиб ўтамиз, аввалроқ Дональд Трамп Эронга қарши уруш режалаштирилган муддатдан тезроқ кечаётгани ва деярли якунланиш арафасида эканини билдирганди.