Уммонда Эрон ва АҚШ музокаралари якунланди

Бугун, 12 апрель куни Эрон ядровий дастури юзасидан Эрон ва АҚШ делегациялари ўртасидаги билвосита музокаралар якунланди. Бу ҳақда Эрон Ташқи ишлар вазирлиги матбуот хизмати хабар берди.

Эронлик делегация аъзоларидан бирининг ISNA’га маълум қилишича, музокаралар “умуман олганда муваффақиятли ўтган”. Эрон Ташқи ишлар вазири Аббос Ароқчи ва АҚШ Президентининг махсус вакили Стивен Уиткофф эса Эрон ядровий дастури юзасидан вазиятни тартибга солиш бўйича музокараларни кейинги ҳафта давом эттиришга келишиб олганини билдирган.

“Музокараларни кейинги ҳафта давом эттиришга келишиб олинди”, дейилади Эрон ТИВнинг баёнотда.

Шунингдек, баёнотда Эрон ва АҚШ вакилларининг ядровий дастур юзасидан маслаҳатлашувлари конструктив руҳда ўтгани қайд этилган.

“Уммон воситачилигида ўтган музокаралар конструктив муҳитда ва ўзаро ҳурмат асосида кечди”, дейилади баёнотда.

Қўшимча қилинишича, Стивен Уиткофф ҳамда Аббос Ароқчи музокаралар якунида Уммон Ташқи ишлар вазири Бадр бин Ҳамад бин Ҳамуд ал-Бусаидий иштирокида шахсан қисқача суҳбатлашган.

“Таъкидлаш жоизки, Эрон ва АҚШ делегациялари раҳбарларининг икки ярим соатдан ортиқ давом этган билвосита музокараларидан сўнг, улар учрашув ўтказилган жойни тарк этар эканлар, Уммон Ташқи ишлар вазири иштирокида бир неча дақиқа давомида суҳбатлашишди”, дейилади Эрон ТИВ баёнотида.

Эслатиб ўтамиз, музокаралар бўлиши 7 апрель куни АҚШ Президенти Дональд Трамп томонидан эълон қилинган эди. Шунингдек, Трамп 7 март куни Эрон Олий раҳнамоси Оятуллоҳ Али Хоманаийга хат юборганини билдирган. Унда Президент Эронни икки йўлдан бирини танлашга ундаган: “келишувга эришиш ёки АҚШ билан ҳарбий тўқнашув”. Бу мактуб БАА орқали етказилган, бироқ унинг мазмуни ошкор этилмаган. “Axios” нашрига кўра, Трамп Теҳронга янги ядровий битим бўйича музокараларни бошлаш учун 60 кунлик муддат берган.

Март ойи охирида Эрондан АҚШга Уммон воситачилигида жавоб етказилган. Эрон Президенти Масъуд Пезешкиённинг айтишича, Теҳрон бевосита музокараларни рад этган, бироқ “билвосита мулоқот йўли очиқ қолган.” Олдинроқ эса Уммон пойтахти Маскатда Эрон ва АҚШ ўртасидаги билвосита музокаралар бошлангани хабар қилинганди.