Украина вакиллари АҚШда ресурслар бўйича келишувни муҳокама қилади

Украина вакиллари яқин кунларда АҚШга ташриф буюриб, мамлакат раҳбарияти билан фойдали қазилмалар бўйича икки томонлама келишувни муҳокама қилади. Бу ҳақда Украина Бош вазирининг биринчи ўринбосари ва Иқтисодиёт вазири Юлия Свириденко кеча, 6 апрель куни Американинг “Associated Press” нашрига берган интервьюсида маълум қилди.

Унинг сўзларига кўра, украиналик делегатлар шу ҳафта – 7-13 апрель кунлари оралиғида АҚШга ташриф буюради. Делегация таркибига Иқтисодиёт, Ташқи ишлар, Адлия ва Молия вазирликлари вакиллари киради.

“АҚШдан келган янги келишув лойиҳаси фонд тузиш ёки биргаликда сармоя киритиш нияти сақланиб қолаётганини кўрсатмоқда”, деган Бош вазир ўринбосари.

Унинг сўзларига кўра, гап техник музокаралар ҳақида кетмоқда, Украинанинг ҳозирги вазифаси – музокаралар учун техник гуруҳни йиғиш, унинг қизил чизиқлари ва асосий тамойилларини аниқлаш.

“Битимнинг барча параметрлари онлайн режимда муҳокама қилиниши мумкин эмаслиги тушунарли. Жамоалар билан ўтириб, суҳбатни шахсан давом эттиришимиз керак”, деган Юлия Свириденко.

Унинг қўшимча қилишича, Киев музокаралар учун юридик, сармоявий ва молиявий маслаҳатчиларни танлаган.

“Бу АҚШ билан муносабатларда янги босқични – кўплаб соҳаларда экспертиза талаб қиладиган босқични англатади. Охир-оқибат ҳаммаси музокаралар давомида ҳал бўлади”, деган у.

Украина ва АҚШ ўртасидаги келишув бўйича музокаралар

Киев ва Вашингтон бир неча ойдан бери фойдали қазилмалар келишуви бўйича музокаралар олиб бормоқда. 15 февраль куни Мюнхенда Владимир Зеленский АҚШ билан шартнома имзолашдан бош тортди ва унда “хавфсизлик кафолатлари бўйича аниқ нарсалар” йўқлигини тушунтирди. Ўшандан бери томонлар келишувнинг янги вариантини муҳокама қилмоқда.

30 март куни Дональд Трамп Зеленскийни фойдали қазилмалар бўйича келишувдан чиқиш ниятида айблади.

“У нодир металлар бўйича келишувдан чиқишга ҳаракат қилмоқда ва агар у буни амалга оширса, унда муаммолар пайдо бўлади, катта, катта муаммолар”, деган эди АҚШ раҳбари.

1 апрель куни Украина ТИВ раҳбари Андрей Сибиганинг маълум қилишича, Киев Вашингтон билан фойдали қазилмалар бўйича келишув икки давлат манфаатларига бирдек жавоб бериши устида ишламоқда.