Украина собиқ президентга қарши санкция жорий қилди

Украина Миллий хавфсизлик ва мудофаа кенгаши Олий Рада депутати ва Украинанинг бешинчи президенти Пётр Порошенкога қарши санкциялар жорий қилди. Бу ҳақда “Forbes” хабар берди.

Санкциялар Украина Президентининг фармони имзоланганидан кейин кучга киради.

Президент Владимир Зеленский кеча, 12 февраль куни кечки видеомурожаатда Рада йиғилишидан сўнг Миллий хавфсизлик ва мудофаа кенгаши томонидан санкция қўлланилишини эълон қилди ва исм-шарифларни айтмади.

“Биз давлатимизни ҳимоя қиламиз ва адолатни тиклаймиз: Украина миллий хавфсизлигини бузган ва Россияга ёрдам берган ҳар бир киши жавобгарликка тортилиши керак. Украинани, Украина манфаатларини, Украина хавфсизлигини сотиш орқали ишлаб топилган миллиардлаб пуллар блокланиши ва Украина ва украиналикларни ҳимоя қилиш учун ишлаши керак. Ва шундай бўлади. Бу мажбурий”, деди Президент.

Санкциялар рўйхатига “одатда олигархлар деб аталадиган йирик бизнес вакиллари” киритилган.

Пётр Порошенко Х ижтимоий тармоғида ўзига нисбатан қўлланилган санкциялар ҳақидаги хабарга жавоб қайтарди.

“Бу менга янгилик сифатида келмади. Менда бу провокацияга тайёргарлик бўйича барча маълумотлар бор эди, лекин охиригача соғлом фикр ғалаба қозонишига ишонардим. Аммо носоғлом ғалаба қозонди”, деб ёзган Порошенко.

У бу қарорни конституцияга зид ва сиёсий асосли деб атади. Порошенко мамлакат Президенти Зеленскийни содир бўлган воқеаларда айблаб, бу қарорнинг салбий оқибатлари учун жавобгарликни ўзига юклади.

Собиқ президент европача демократик Украина учун курашни давом эттиришига ишонтирди.