Туркманистондан ноқонуний олиб кирилаётган 1,3 млрд сўмлик дизель тўхтатилди

Туркманистон мамлакатидан Ўзбекистон ҳудудига 1,3 млрд сўмлик ноқонуний тарзда дизель ёқилғисини олиб кириш ҳолати аниқланди. Бу ҳақда “Ўзэнергоинспекция” хабар берди.

Маълум қилинишича, “Ўзэнергоинспекция” ва Божхона қўмитаси Бухоро вилоят бошқармаси ҳамкорлигида ўтказилган назорат тадбирида Туркманистондан Ўзбекистон ҳудудига дизель ёқилғисини ноқонуний тарзда ҳужжатларда “Битумная мастика” тарзида кўрсатиб олиб киришга бўлган уриниш фош этилган.

“Хусусан, Бухоро вилоятидаги “Олот” чегара пости орқали оғирлиги 115 тонна (қиймати 1 млрд 300 млн сўмлик) ҳужжатларда “Битумная мастика” дея кўрсатилган товар “Ўзэнергоинспекция” кимё лабораторияси хулосасига кўра дизель ёқилғиси эканлиги маълум бўлди”, дейилади хабарда.

Қайд этилишича, ушбу қонунбузарлик ҳолати юзасидан ҳужжатлар расмийлаштирилиб, ёқилғи маҳсулотлари вақтинча сақловга олинган.

Эслатиб ўтамиз, кеча, 9 февраль куни ДХХ Чегара қўшинлари томонидан Божхона қўмитаси билан ҳамкорликда йирик миқдордаги гиёҳвандлик воситаларининг Ўзбекистонга олиб кирилишига қарши навбатдаги тадбирда 2986 дона супургининг дастаклари орасидан қорадори топилганди.