Туркия сайёҳлар учун яна бир чекловни бекор қилди

Туркия ҳукумати пандемияга қарши кураш доирасида жорий этилган ПЗР тести ёки антиген тести натижаларини тақдим этиш талабини бекор қилиб, республикага кириш қоидаларини сезиларли даражада юмшатди. Бу ҳақда Туркия Ички ишлар вазирлигининг кеча, 31 май куни тарқатилган циркулярида айтилади.

“1 июндан бошлаб мамлакатга барча чегара пунктларида кириш учун кўпи билан 72 соат олдин топширилиши керак бўлган ПЗР тести сертификати ёки киргандан кейин 48 соат ичида топширилиши керак бўлган тезкор антигеннинг салбий натижаси талаб қилинмайди”, дейилади вазирлик ахборотида.

Аввалроқ Туркия коронавирус тести манфий натижа берган ёки COVID-19 га қарши эмлашнинг тўлиқ курсидан ўтганлиги ҳақидаги ҳужжатлар билан мамлакатга киришга рухсат берган эди. Синовлар, шу жумладан 12 ва ундан катта ёшдаги болалар учун ҳам зарур эди. Шу билан бирга, эмланган саёҳатчилар Жаҳон соғлиқни сақлаш ташкилоти (ЖССТ) ёки Туркия Соғлиқни сақлаш вазирлиги томонидан шошилинч фойдаланиш учун рўйхатга олинган дорилар билан тўлиқ эмлангани ҳақида сертификат тақдим этишлари керак эди.

Охирги икки ҳафта ичида Туркияда ҳар куни 1000 дан кам янги коронавирус инфекцияси ҳолати қайд этилди, шу муносабат билан расмийлар COVID-19 бўйича чекловларни тизимли равишда олиб ташламоқда. Шу билан бирга, чекловларнинг аксарияти март ойида бекор қилинди. 29 майдан бошлаб Туркияда ниқоб кийиш мажбурий эмас, бу қоида шифохоналар учун сақлаб қолинган.