Трамп Украинага ҳарбий ёрдамни буткул тўхтатиб қўйди – ОАВ

АҚШ Президенти Дональд Трамп Украина раҳбарияти “тинчлик тарафдори” эканини намойиш қилмагунча, Россияга қарши мудофаа урушида Украинага ҳарбий ёрдамни музлатишга буйруқ берди. Бу ҳақдаги қарор 4 март куни қабул қилинган. 

“Президент тинчлик тарафдори эканини очиқ айтди. Биз ҳамкорларимиз ҳам шу мақсад сари содиқ бўлишлари керак. Биз ёрдамимизни тўхтатиб, у муаммони ҳал қилишга ёрдам бераётганига ишонч ҳосил қилиш учун кўриб чиқмоқдамиз”, дейди Оқ уй расмийси анонимлик шарти билан.

Трампнинг ўзи бу қарорга ҳозирча изоҳ бермади. Оқ уйдан ҳам расмий маълумот олинмади.  

“Бу ёрдамнинг доимий якуни эмас, бу пауза”, дея аниқлик киритди Fox News АҚШ Президенти маъмурияти вакилига таяниб.  

Бу қарорни қабул қилишдан олдин Трамп Давлат котиби Марко Рубио ва Мудофаа вазири Пит Хегсет билан маслаҳатлашиш учун учрашди, дея аниқлик киритмоқда телеканал. 

Bloomberg агентлигига кўра, қарор Украинага ҳали етказиб берилмаган барча Америка ҳарбий техникасига, жумладан, Польша орқали транзит қилинадиган ёки транзитни кутаётган қуролларга ҳам таъсир қилади.

Wall Street Journal кеча, 3 март куни АҚШнинг амалдаги ва собиқ расмийларига таяниб, Дональд Трамп маъмурияти Украинага янги қурол етказиб беришни молиялаштиришни тўхтатгани ва АҚШ захираларидаги таъминотни музлатиш масаласини кўриб чиқаётгани ҳақида хабар берди, бу эса Киевнинг Россия қўшинларининг олдинга силжишига қарши туриш қобилиятига бевосита таҳдид солади. Украинага асосий қурол етказиб бериш линиясини ёпилиши мумкин бўлган ҳаракатлар Трамп ва Зеленский ўртасидаги Овал кабинетдаги даҳанаки жангдан бир неча кун ўтгач, содир бўлди.