Трамп Путин боришидан олдин Лукашенкога сим қоқди

АҚШ Президенти Дональд Трамп Россия раҳбари Владимир Путин билан учрашувга йўл оларкан, беларуслик Александр Лукашенко билан телефон орқали суҳбатлашиб, 1300 маҳбусни озод қилиш масаласини муҳокама қилди. Бу ҳақда Оқ уй раҳбари бугун, 15 август куни Truth Social ижтимоий тармоғида ёзиб қолдирди. 

“Ҳурматли Александр Лукашенко билан ажойиб суҳбат қурдик. Қўнғироқнинг мақсади – 16 нафар маҳбусни озод қилгани учун унга миннатдорлик билдириш эди. Шунингдек, яна 1300 нафар маҳбусни озод қилиш масаласини ҳам муҳокама қилдик”, дея ёзган Трамп. 

Шунингдек, Америка раҳбари суҳбатни “жуда самарали” деб атаган. 

“Кўплаб мавзуларни муҳокама қилдик, жумладан, Президент Путиннинг Аляскага ташрифини ҳам. Келажакда Лукашенко билан учрашувни интиқлик билан кутяпман”, дея қўшимча қилган Трамп. 

Лукашенко матбуот хизматининг маълум қилишича, у Трампни Минскка таклиф қилган ва бу таклиф қабул қилинган. Бироқ Америка томони бу ҳақда маълумот бермаган.

Қайд этиш жоиз, Трамп биринчи президентлиги даврида АҚШ Лукашенкони Беларуснинг қонуний раҳбари сифатида тан олмаслигини билдирган эди. Қолаверса, АҚШ Давлат департаменти 2025 йилги Беларусь сайловлари “мавжуд репрессив шароитларда эркин ва адолатли бўлиши мумкин эмас” деган эди. 

2025 йилнинг июнь ойи охирида Беларусь президенти лавозимига собиқ номзод Сергей Тихановский ва яна 13 нафар сиёсий маҳбус озод этилган. Бу воқеа Александр Лукашенконинг Минскдаги Мустақиллик саройида АҚШ Президентининг Украина бўйича махсус вакили Кит Келлогг билан учрашувидан сўнг юз берган. Лукашенко ва Келлогг ўртасидаги музокаралар кун тартибига халқаро муаммолар ва дунёдаги умумий вазият, минтақавий муаммолар ҳамда Беларусь-Америка муносабатлари киритилган. Шу тариқа Келлогг сўнгги йилларда Беларусга борган АҚШнинг энг юқори лавозимли расмийси бўлган.