Трамп Эрон урушининг кейинги босқичи бўйича учта вариантни кўриб чиқмоқда

АҚШ Президенти Дональд Трамп Эрон билан давом этаётган можаронинг кейинги ривожи бўйича 3 та вариантни муҳокама қилмоқда. Бу ҳақда ТАСС хабар берди.

Нашрга кўра, Оқ уйда қуйидаги 3 та вариант муҳокама қилиняпти:

• Эронга қарши ҳарбий ҳаракатларни янада кучайтириш;
• Теҳронга нисбатан янги иқтисодий санкциялар жорий этиш орқали босимни ошириш;
• АҚШ урушдаги мақсадларига эришганини эълон қилиб, можародан чиқиш.

Қайд этилишича, ушбу масалалар сўнгги ҳафталарда Трамп иштирокида ўтган ёпиқ йиғилишларда муҳокама қилинган. Учрашувларда АҚШ вице-президенти Жей Ди Вэнс, Мудофаа вазири Пит Ҳегсет, Бирлашган штаб бошлиқлари қўмитаси раиси генерал Дэн Кейн, Трампнинг куёви Жаред Кушнер ҳамда президентнинг махсус вакили Стив Уиткофф қатнашган.

Маълум қилинишича, можаро беш ойдан бери давом этаётганига қарамай, АҚШ ўз олдига қўйган асосий мақсадларга эриша олмаган. Хусусан, Вашингтон “устун ҳарбий куч” ёрдамида Эрондаги сиёсий ҳокимиятни ўзгартиришга муваффақ бўлмаган.

Эслатиб ўтамиз, АҚШ ва Эрон ўртасидаги навбатдаги кескинлик жорий йилнинг 8 июль куни АҚШнинг Эрон ҳудудига берган зарбалари ортидан бошланган. Вашингтон бу ҳужумларни Ҳормуз бўғозида тижорат кемасига уюштирилган ҳужумга жавоб сифатида изоҳлаган.

Ўша куни Дональд Трамп Эрон билан амал қилиб келган ўт очишни тўхтатиш режими якунланганини эълон қилган. Шундан сўнг Теҳрон Баҳрайн, Қувайт, Бирлашган Араб Амирликлари, Қатар ва Иорданиядаги АҚШ ҳарбий объектларига зарбалар берган.

Жорий йилнинг 24 июль куни томонлар ўзаро зарбаларни тўхтатган. Бироқ “The New York Times” маълумотларига кўра, Оқ уй ҳозирча можарони қандай йўл билан давом эттириш бўйича якуний қарорга келмаган ва учала сценарий ҳам амалда кўриб чиқилмоқда.

Эслатиб ўтамиз, аввалроқ АҚШ Президенти Дональд Трамп Эронга янги миқёсда зарбалар беришни кейинга сургани ҳақида хабар берилган эди.