Таиландда яна кран қулаб тушди. 2 киши ҳалок бўлди

Бугун, 15 январь куни Таиландда қурилаётган осма автомагистралда кран қулаб тушди. Бу ҳақда маҳаллий полиция маълумотларига таяниб, “Reuters” хабар берди.

Маълумотларга кўра, Таиланднинг Самут Сакҳон провинциясида осма автомагистраль қурилиши пайтида кран қулаб тушган. Оқибатда иккита транспорт воситаси эзилиб кетган, икки киши ҳалок бўлган.

Маҳаллий туман полиция бўлими бошлиғи, полиция полковниги Ситтҳипорн Касининг сўзларига кўра, сўнгги воқеа пойтахт Бангкок яқинидаги Самут Сакҳон вилоятида содир бўлган, у ерда осма автомагистраль қурилишида иштирок этган кран, қурилиш остида –йўлда ҳаракатланиб кетаётган транспорт устига қулаган. Бўлимдаги яна бир полиция ходими автоҳалокатда беш киши жароҳат олганини айтган.

Бу Таиланддаги қурилиш лойиҳалари туфайли содир бўлган бир қатор ҳалокатли бахтсиз ҳодисаларнинг сўнггиси бўлиб, кеча 14 январь куни Накҳон Ратчасима провинциясининг шимоли-шарқида кран йўловчи поезд устига қулаши оқибатида 32 киши ҳалок бўлганди. Бундан ташқари, поезддаги 195 йўловчидан 66 нафари турли даражада жароҳат олган.

Ҳозирда ҳар иккала ҳолат юзасидан тергов ҳаракатлари олиб борилмоқда дейилади, хабарда.