Сурхондарёда қурилиш мансабдори ва архитектор қўлга олинди

north_east

Ўлим, қамоқ, тошбўрон ва мусодара: дунё коррупция билан қандай курашмоқда?

Сурхондарё вилоятида пора сўраган қурилиш ва уй-жой коммунал хўжалиги мансабдори ҳамда архитектор ушланди. Бу ҳақда Давлат хавфсизлик хизмати хабар берди.

Қайд этилишича, қурилиш ишларини лойиҳалаштиришга ихтисослашган МЧЖ архитектори Музработ туманида яшовчи фуқаронинг ишончига кирган ҳолда, унга қарашли бўлган, қурилиши тугалланмаган нотурар бино лойиҳа ҳужжатларини тегишли ташкилотлардан муаммосиз ўтказиб бериш эвазига фирибгарлик йўли билан 17 миллион сўм талаб қилган.

ДХХ ва ички ишлар органлари ҳамкорлигида ўтказилган тезкор тадбирда у сўралган пул маблағини олган вақтида ашёвий далиллар билан ушланди.

Шундан сўнг, тезкор тадбир давом эттирилиб, архитектор 17 миллион сўмдан 1 миллион сўмини Музработ туман Қурилиш ва уй-жой коммунал хўжалиги бўлими бошлиғига бериши кераклиги маълум бўлиб, мазкур мансабдор ҳам ушбу пул маблағини олган вақтида қўлга олинди.

Ҳозирда уларга нисбатан жиноят иши қўзғатилиб, тергов ҳаракатлари олиб борилмоқда.

Эслатиб ўтамиз, жорий йилнинг 5 март куни Президент Шавкат Мирзиёев ўз раислигида ўтган коррупциянинг олдини олиш бўйича ишлар натижадорлиги ва келгусидаги устувор вазифаларга бағишланган кенгайтирилган йиғилишда ислоҳотлар йўлидаги энг катта тўсиқ ва ғов – бу коррупция эканини айтганди. 21 апрель куни қабул қилинган “Давлат органлари ва ташкилотларининг коррупцияга қарши ички назорат бўлинмалари мустақиллигини таъминлаш ҳамда фаолияти самарадорлигини ошириш чора-тадбирлари тўғрисида”ги Президент қарорида 3 та вазирликда, жумладан, Қурилиш ва уй-жой коммунал хўжалиги вазирлигида коррупцияга қарши ички назорат тизими самарадорлигини ошириш бўйича ҳуқуқий эксперимент ўтказилиши белгиланганди.