Сунъий интеллект, тил ва таълим. Президентларнинг Словениядаги 18 ёшли таржимони

Ўзбек қаерда йўқ?! Америка, Европадами, Африка ёки Австралияда – хуллас, дунёнинг исталган нуқтасида ўзбекнинг изи бор. Улар фақат меҳнат муҳожири эмас, балки шифокор, тадбиркор, дастурчи ва умуман, ҳар қандай соҳада муваффақият қозонган, пешқадам мутахассислар сифатида ҳам эътироф этилмоқда. Ҳаттоки, Словенияда ҳам ўзбек болалари Президентлар билан уларнинг тилида эркин мулоқот қилиб, ўз лойиҳаларини илгари сурмоқда.

Бугунги қаҳрамонимиз – шундай иқтидорли ёшлардан бири, 18 ёшли талаба Шаҳриёр Исъҳоқов.

Шаҳриёр 2007 йилда Тошкент шаҳрида шифокорлар оиласида туғилган. 2024 йилда Словениянинг энг нуфузли ва қадимий олий таълим муассасаларидан бири – Любляна университетига ўқишга қабул қилинган. У сунъий интеллект соҳасида таҳсил олмоқда ва бир қатор инновацион лойиҳалар устида ишлаяпти.

Ўзбекистонда бўлган пайтида дўсти Юсуф билан инглиз тилида мамлакат маданияти ҳақида видеоконтентлар тайёрлаган. Бу лойиҳа кейинчалик Ёшлар ишлари агентлиги томонидан қўллаб-қувватланган ва янги ғоялар амалга ошишига туртки берган.

IELTS имтиҳонида 7, SAT тестида эса 1350 балл тўплаган қаҳрамонимиз нима учун айнан Словенияни танлагани ҳақида шундай дейди:

“Менга сунъий интеллект ва компьютер технологиялари жуда қизиқ. Бувам Словенияни тавсия қилган эдилар, чунки бу мамлакат Европада айнан шу соҳада кучли ўнталикка киради. Кейинчалик, Любляна университетидаги профессорлар билан суҳбатлашиб, айнан шу йўлни танладим”.

Шаҳриёрнинг айтишича, университетда кўплаб сунъий интеллект лабораториялари мавжуд бўлиб, уларда қатор амалий лойиҳалар олиб борилади. Масалан, сунъий интеллект ёрдамида словен тилини ўргатиш ёки болаларда Альцгеймер касаллигини аниқлаш каби ишлар шулар жумласидандир. У келажакда Ўзбекистонда ҳам шундай лабораториялар ташкил қилишни режалаштирмоқда:

“Менимча, сунъий интеллектнинг келажаги жуда катта, чунки бу технологияни тиббиёт, ҳуқуқ, IT ва бошқа соҳаларда қўллаш мумкин”.

Шунингдек, Шаҳриёр 2025 йил 22 май куни бўлиб ўтган Словения-Ўзбекистон бизнес форумида икки давлат Президентларига таржимонлик ҳам қилган. Унинг таъкидлашича, Словенияга борганида, бу тилни ўрганишни ўз олдига мақсад қилиб қўйган ва бор-йўғи олти ойда уни мукаммал ўрганиб олган:

“Словен тили осон эмас. Лекин мен ўзимга дедим – бу тилни ўрганишим шарт. Чунки янги одамлар билан танишиш, профессорлар билан мулоқот қилишим керак. Одамлар кўпинча тил ўрганаётганда хато қилишдан қўрқади. Аммо мен хато қилсам ҳам гапиришдан тўхтамадим. Тил билиш – ҳар доим ҳурмат келтиради. Қолаверса, Любляна университетида ҳам дарслар асосан словен тилида ўтилади, хорижликлар учун давлат тилини ўрганиш бепул”.

Айни шу тил билиш маҳорати Шаҳриёрга Президентлар билан мулоқот қилиш, ўз лойиҳаларини тақдим этиш ва уларга таржимонлик қилиш имконини берди. Бу воқеани у шундай ёдга олади:

“22 май куни Словения-Ўзбекистон бизнес форуми бўлиб ўтди. Мени ушбу тадбирга таржимон сифатида таклиф қилишди. Шу ерда икки давлат раҳбарлари – Шавкат Миромонович Мирзиёев ва Словения Президенти Наташа Пирц Мусар билан суҳбатлашдик. Президентимиз ёшларга яратилаётган имкониятлар ҳақида гапирдилар. Бу суҳбат менга катта таъсир қилди. Чунки менинг ниятим – сунъий интеллектни Ўзбекистонда ҳам ривожлантириш”.

Ушбу интервьюни тўлиқ шаклда юқоридаги видеоплеерда ёки QALAMPIR.UZ'нинг YouTube каналида томоша қилишингиз мумкин.