Шомуродов ва “Рома” бугун Европа лигаси доирасида “Атлетик”ни меҳмон қилади

Бугун, 6 март куни Европа лигаси 1/8 финал босқичи илк ўйинлари бўлиб ўтади. “Реал Сосьедад” – “ Манчестер Юнайтед”, ФКСБ – “Лион”, “Фенербахче” – “Рейнжерс”, АЗ – “Тоттенхэм”, “Виктория” – “Лацио”, “Будё Глимт” – “Олимпиакос”, “Аякс” – “Айнтрахт”, “Рома” – “Атлетик” каби ўйинлар бугунги кун тартибидан ўрин олган.

Римда бугун “Атлетик” меҳмон бўлади

Европа лигаси қуръасидан сўнг Римнинг “Рома” клуби Бильбаонинг “Атлетик”ига қарши майдонга тушиши аниқ бўлди. Европа лигаси гуруҳ босқичида “Атлетик” 8 турдан кейин 19 очко жамғариб, 2-ўринга эга чиқди ва 1/8 финал босқичига тўғридан тўғри йўл олди. 
“Рома” эса 15-ўринни эгаллаб, ўтиш ўйинида Португалиянинг “Порту”сини икки ўйин натижасига кўра 4:3 ҳисобида мағлуб этиб, ушбу босқичга етиб келди. 
Римликлар А Серияда 27-турдан кейин 43 очко тўплаб, 8-поғонадан жой олган. “Атлетик” эса Ла Лига турнир жадвалида 26-турдан сўнг 48 очко жамғариб, 4-ўринни банд этган. Бу ўйинда фаворит номини айтиш мушкулроқ. Дастлабки баҳсда римликлар ўз уйидаги устунликни ҳисобга кўчиришга ва Бильбаодаги жавоб ўйинига ижобий натижа билан боришга ҳаракат қилади. “Атлетик” эса барча масалани Римдаёқ ҳал қилишга уриниб кўради. Мазкур учрашув Тошкент вақти билан 7 мартга ўтар кечаси 01:00 да старт олади.

Раньерининг ишончига кириб олган Шомуродов

“Рома” сафида ўзбекистонлик футболчи Элдор Шомуродов мураббий Клаудио Раньерининг ишончига кириб олган ва кетма-кет ўйинларда асосий таркибда майдонга тушмоқда. Хаттоки, Шомуродов “Рома”да февраль ойининг энг яхши футболчиси ҳам бўлди. Бу эса аввало, футболчининг ўзига бўлган ишончини анча оширади. Клубдаги асосий рақобатчиси украиналик Артём Довбик ўзини ёмон ҳис қилаётгани ҳам ўзбекистонлик футболчи учун асосий таркибдаги имкониятларини ишга солишга туркти бўлди. Раньери айни дамда Шомуродов билан ҳужум чизиғида тандем сифатида икки аргентиналик Матиас Суле ва Пауло Дибаладан бирини туширмоқда. Кези келганда Суле ҳужум ортида, Шомуродов ва Дибала ҳужум марказида ўйнамоқда. Кетма-кет учрашувлардаги намойиш этаётган фаол ўйини сабаб, ўзбекистонлик футболчи Элдор Шомуродов бугунги ўйинда ҳам асосий таркибда майдонга тушиши кутилмоқда. 

Маълумот ўрнида, Европа лигаси 1/16 финал босқичининг жавоб ўйинлари 13 март куни ўтказилади.