Сербияга Ўзбекистоннинг биринчи элчиси тайинланди

Ўзбекистоннинг Фавқулодда ва мухтор элчиси (қароргоҳи Будапешт шаҳрида жойлашган) Ойбек Шахавдинов Сербия Ташқи ишлар вазирлиги дипломатик протокол раҳбари Бранко Радовановичга ишонч ёрлиқлари нусхаларини топширди. Бу ҳақда “Дунё” ахборот агентлиги хабар берди.

Қайд этилишича, суҳбат чоғида икки томонлама кун тартибининг долзарб масалалари муҳокама қилинган ва Ўзбекистон-Сербия муносабатларини янада мустаҳкамлашдан икки томон ҳам манфаатдорлик билдирган. Хорижий томон Ўзбекистоннинг Сербияга биринчи элчиси тайинланганини олқишлаб, бу қадам икки томонлама ҳамкорликнинг бутун йўналишига янги суръат бағишлашини таъкидлаган.

Эслатиб ўтамиз, Ўзбекистоннинг Фавқулодда ва мухтор элчиси Ойбек Шахавдинов 2024 йил 13 декабрь куни Словения Президенти Наташа Пирц-Мусарга ишонч ёрлиқларини топширган эди.

Ойбек Шахавдинов, шунингдек, Ўзбекистоннинг Венгриядаги биринчи, шунингдек, ўриндошлик асосида Хорватия ва Черногориядаги элчиси ҳисобланади.