Руминияда пойтахт мэри президентлик сайловида ғалаба қозонди

Бухарестнинг либерал-прогрессив мэри Никушор Дан Руминияда президентлик сайловларининг иккинчи босқичида ғалаба қозонди. Бу ҳақда мамлакат сайлов бюроси маълумотларига таяниб, AFP хабар берди.

Сайлов бюллетенларининг қарийб 99 фоизи ҳисобланганидан кейин у 54 фоиз овозга эга бўлиб, рақиби, 46 фоиз овоз олган ўта ўнгчи Жорж Симионни ортда қолдирди.

Даннинг ғалабаси Шаҳар ва минтақавий социология маркази ва Авангарде ижтимоий ва хулқ-атвор тадқиқот гуруҳи томонидан ўтказилган экзит-полл маълумотлари билан ҳам тасдиқланди.

Шу билан бирга, Симион дастлаб ўзининг ғалабасини эълон қилди.

“Биз бу сайловларда аниқ ғолибмиз. Биз бу ғалабани Руминия халқи номидан эълон қиламиз”, деди у Бухарестдаги тарафдорларига жонли эфирда овоз бериш участкалари ёпилгандан кейин.

У худди шундай баёнотларни Facebook ва Х микроблоглар тармоғида ҳам эълон қилган. 

Кейинчалик у мағлубиятини тан олди ва Данни табриклади.

“У сайловларда ғалаба қозонди ва бу Руминия халқининг иродаси эди”, деб ёзди Симион.

Маълумот учун, Руминияда президентлик сайловининг биринчи босқичи 4 май куни бўлиб ўтди. Натижаларга кўра, Симион 41 фоизга яқин, Дан 20,99 фоиз овоз олган.