Рубио Украина ва Россия ўртасидаги музокаралар қайта бошланишини эълон қилди

АҚШ яқин ҳафталарда Украина ва Россия ўртасидаги музокаралар жараёнини қайта тиклашга ҳаракат қилиш ниятида. Бу ҳақда Давлат котиби Марко Рубио “Fox News” эфирида сўз очди.

Унинг сўзларига кўра, Америка томони томонларнинг музокаралар столига қайтиш имкониятини аниқлаш учун дипломатик саъй-ҳаракатларни амалга оширади. Шу билан бирга, у келишувга эришишга низонинг ҳар икки томонида сақланиб қолаётган қатъий “қизил чизиқлар” халақит бераётганини билдирган.

“Биз, шунингдек, иккала томоннинг ҳам етарлича аниқ қизил чизиқлари борлигини тушунамиз ва ушбу қизил чизиқларни бироз яқинлаштиришга эришмагунимизча, кўзланган натижага эриша олмаймиз. Аммо биз бунга тайёрмиз”, дейди у.

Эслатиб ўтамиз, аввалроқ АҚШ Президенти Дональд Трамп Россия ва Украина етакчилари Владимир Путин ҳамда Владимир Зеленский низони якунлаш бўйича битим тузишни хоҳлашларини, бироқ бу иккала томондан ҳам ён беришларни талаб қилишини айтган эди. Июль бошида у, шунингдек, Россия ва Украина тинчликни хоҳлаётгани ва тез орада “нимадир амалга ошишини” таъкидлаган эди.

Кремль Украина билан музокараларда танафсус юзага келганини маълум қилган. Россия Президентининг матбуот котиби Дмитрий Песковнинг сўзларига кўра, музокаралар жараёнини давом эттириш бўйича ҳозирча ҳеч қандай келишувлар йўқ. АҚШ Яқин Шарқдаги вазият билан банд, аммо Россияга Украинадаги низони ҳал қилишда воситачиликни давом эттириш ниятида экани ҳақида сигналлар юбормоқда.

Россия расмийлари Украина ва Европа билан музокаралар учун очиқ эканини бир неча бор таъкидлаган. Июнь ойида Путин Стамбулдаги музокараларда Россия ва Украина ўртасида эришилган келишувларни кейинги мулоқот учун асос деб атаган эди.

Ўшанда Зеленский ўз сайтида Путинга очиқ хат эълон қилиб, унда низони якунлаш учун тўғридан тўғри икки томонлама мулоқотни бошлашни таклиф қилган ва Россия ҳамда Украина етакчилари холис майдонда музокаралар ўтказиши мумкинлиги ҳақида фикр билдирган эди. Россия Президенти хатда “қўполлик элементлари” борлигини ва у музокаралар учун шароит яратишга қаратилмаганини айтган.