Россиянинг Украинага ракета “ёмғири” НАТОни ҳаракатланишга ундади – Макрон

Франция Президенти Эммануэль Макрон яқин ҳафталар ичида НАТОнинг шарқий қанотидаги ҳарбийларини қўшимча қўшинлар, танклар ва қуроллар билан кучайтиришини маълум қилди, деб ёзмоқда BBC news.

Бу қарор Россия Украинадаги урушни бутун мамлакат бўйлаб йирик ракета зарбалари билан кучайтирган вақтда ва Президент Макроннинг Украинага 100 миллион евролик қурол ажратиш ҳақидаги эълонидан кейин маълум қилинди. 

“НАТОнинг шарқий қанотидаги вазиятни ва Украинадаги жангларнинг шкаласини ҳисобга олиб, Эммануэль Макрон Европанинг Шарқий қанотдаги мудофаа позициясини мустаҳкамлашга қарор қилди”, дейди Франция Мудофаа вазири Себастян Лекорну Сенат мудофаа қўмитасининг тингловида.

НАТО миссиясининг асосий давлати бўлган Руминияда айни вақтда 350 нафар француз, шунингдек, Бельгия ва Голландия аскари бор. Келгусида Франция мамлакатда ўнлаб зирҳли пиёда машиналарини (VBCI) ва ўнлаб Leclerc танкларини жойлаштиришни режалаштирмоқда. Бу Париж ноябрь ойида ҳудуддаги контингентини икки баравар ошираётганини англатади, дейди Лекорну.

Шунингдек, у Литвада француз ҳарбий кучлари модернизация қилинишини, у ерда Rafale қирувчи самолётлари жойлаштирилишини ва Эстонияда қўшимча 100 нафар пиёда аскарлар жойлаштирилишини айтди.

Вазирлик ҳисоб-китобларига кўра, НАТОнинг Шарқий Европадаги мудофаа позициясини мустаҳкамлашга қаратилган ҳаракатлар жорий йилда Франция учун 600-700 миллион еврога тушади. 

Франция Президенти Париж Украинага 6 та "Caesar" қуролини юбориш имкониятини кўриб чиқаётганини тасдиқлади. Бундан олдин 18 та худди шу турдаги қуроллар Киевга етказиб берилган эди. Франция артиллериясининг флагмани бўлган ушбу 155 мм қуроллар 40 километр масофадаги нишонларни йўқ қила олади.

Мусулмон Зиё