Россия сувости кемалари Атлантика океанида ҳар қачонгидан ҳам фаолроқ – АҚШ 

НАТО ва АҚШнинг Европадаги ҳарбий амалиётлари бўйича бош қўмондони, армия генерали Крис Каволининг айтишича, Россия Украина урушида катта куч сарфлаётганига қарамай унинг сувости кемалари Атлантика океанидаги фаолликни яқин йиллар ичида ҳар қачонгидан ҳам юқори даражага оширган. Бу ҳақда “U.S. News” хабар берди. 

Қайд этилишича, Конгрессда нутқ сўзлаган Каволи Россия қўшинларининг жиддий таназзулга учрагани ҳақидаги хулосаларга зид бўлган бир нечта мисоллардан бирини келтирган. Унинг айтишича, Россия сув ости кемаларининг Атлантика океанидаги фаоллиги ҳар қачонгидан ҳам юқори даражага етган. 

“Уларнинг патруллари Атлантика бўйлаб юқори ҳолатда. Биз йиллар давомида кузатганимиздан ҳам юқори даражада. Ва бу уларнинг Украинада қилган барча саъй-ҳаракатларига қарамай шундай”, дейди у Вакиллар палатаси Қуролли кучлар қўмитаси олдида. 

Таҳлилчилар сўнгги ойларда Россиянинг Атлантикадаги сувости кучлари бўйича хавотир билдираётган бўлсада, улар асосан унинг ўтган ҳафта оммавий машғулот ўтказган Тинч океани флотига эътибор қаратган. Ушбу манёврлар қисман Москва ва Пекин ўртасидаги алоқаларнинг мустаҳкамлангани сифатида баҳоланган. 

Аввалроқ Россия Атлантика океанига ўзининг ҳарбий кемаларини жўнатганда АҚШ хавотир билдирганди. Чунки мамлакат расмийларининг фикрича, Россия ҳарбий кемалардан АҚШ ракетага қарши мудофаа тизимини мағлуб этоладиган гипертовушли қуроллардан отиши мумкин деб ҳисоблаган. 

Россиянинг сувдаги фаоллашуви ҳақидаги таҳлиллар охирги пайтларда унинг қўшинларидаги заифлашув, муваффақиятсизликлар ва муаммолар бўйича янграётган тахминларга қарама-қарши тарзда чиққан. 

Бахмут каби шаҳарлар атрофидаги жанглар Россия қўшинларининг жанговар ҳолати ҳали ҳам ёмон эмаслигини кўрсатаётган бўлсада, таҳлилчилар уни қийнаётган қуруқликдаги муаммоларга кўпроқ урғу беряпти. 

"Россиянинг Украинадаги кучлари бутун фронт бўйлаб марказлаштирилмаган ва асосан деградацияга учраган тузилмаларда ҳаракат қилмоқда”, дейилади Урушни ўрганиш мустақил институтининг 23 апрель куни эълон қилинган таҳлил хулосасида. 

Россия қўшинининг қудрати ҳали ҳам пасаймагани ҳақидаги изоҳлар асосан Республикачилар партияси вакиллари томонидан берилмоқда. 2024 йилги АҚШ президентлик сайловлари учун партиянинг бир қанча етакчи номзодлари Украинага ёрдам кўрсатишнинг аҳамиятини шубҳа остига олиб, бунинг ўрнига Хитойни тийиб туришга эътибор қаратиш кераклигини таъкидламоқда.