Россия мактаблари хулқ-атворни баҳолашда советча амалиётга қайтади

Россия Халқ таълими вазирлиги мактабларда ўқувчиларнинг хулқ-атворини баҳолашни назарда тутувчи буйруқ лойиҳасини тайёрлади. Унга кўра, Россияда жорий йил 1 сентябрдан бошлаб мактабларда ўқувчиларнинг хулқ-атвори учун баҳо қўйиш бўйича совет давридаги амалиёт қайта жорий этилиши мумкин. Бу ҳақдаги ҳужжат норматив-ҳуқуқий ҳужжатлар лойиҳаларининг федерал порталида эълон қилинган.

Лойиҳа матнига кўра, ички тартиб-қоидаларга, жумладан, дарс жараёнидаги интизомга риоя этилиши устидан назорат “ўқувчиларнинг хулқ-атворига баҳо қўйишни” ҳам ўз ичига олиши мумкин. Шунингдек, ўқувчилар фавқулодда ҳолатлардан ташқари дарс вақтида мобил телефонлардан фойдаланмасликка мажбур бўлади. Агар ҳужжат тасдиқланса, у 2026 йил 1 сентябрдан кучга киради.

Бунгача “Интерфакс” вазирлик раҳбари Сергея Кравцовга таяниб, хулқ-атвор учун баҳони умумий жорий этиш масаласи 2026 йил апрель ойида тажриба натижаларига кўра ҳал қилиниши ҳақида хабар берган. Пилот лойиҳа 2025 йил 1 сентябрда еттита ҳудуд мактабларида ишга туширилган: Новгород, Ярославл, Тула, Ленинград вилоятлари, Чеченистон Республикаси, Мордовия Республикаси ҳамда Украинанинг босиб олинган Луганск вилояти ҳудудида. Тажриба ўқув йилининг охиригача давом этади ва 1–8-синф ўқувчиларини қамраб олади.

Ҳудудларга баҳолашнинг учта шаклидан бирини танлаш таклиф этилган: беш балли тизим (“аъло”, “яхши”, “қониқарли”, “қониқарсиз”), ўтказилди/ўтказилмади шаклидаги баҳолаш ёки уч балли тизим (“намунали”, “йўл қўйиладиган”, “йўл қўйиб бўлмайдиган”).

“Учитель” касаба уюшмаси раиси Дмитрий Казаков ташаббусни танқид остига олган. Унинг фикрича, хулқ-атвор учун баҳо қўйиш мактабларда мавжуд муаммоларни, жумладан, низоларни ҳал этиш масаласини бартараф эта олмайди ва бу “мўъжизавий ечим излашга уриниш” бўлиб, ижобий натижа бериши даргумон.