Россия фуқароларини Германияга бормасликка чақирди

Кеча, 25 декабрь куни Россия Ташқи ишлар вазирлигининг расмий вакили Мария Захарова брифингда Россия фуқароларини Германияга шошилинч зарурат бўлмаган вазиятда бормасликка чақирди. Тегишли тавсиялар вазирликнинг расмий сайтлари ва Россиянинг чет элдаги ваколатхоналарида эълон қилинди.

Бундай огоҳлантиришга сабаб Германияда Россия фуқаролари билан юз берган ҳолатлар бўлиб, немис ҳукуматининг уларни санкцияларни бузишда гумон қилиши ҳисобланади. Мисол сифатида Захарова Штутгарт аэропортидаги воқеани келтирган. Ўша воқеада немис божхона ходимлари россиялик аёлдан шахсий буюмлар ва нақд пулни олиб қўйган.

Захарова шундай чоралар нафақат оддий фуқаролар, балки расмий шахсларни ҳам қамраб олаётганини таъкидлаган. Бунинг исботи сифатида у Мюнхен аэропортида “Зенит” жамоаси бош мураббийи Сергей Семак ва унинг рафиқаси Анна билан юз берган воқеани эслаган: улар Европа Иттифоқи ҳудудида сотиб олинган буюмлар, жумладан бир жуфт этик, кўзойнак ва рўмол учун жаримага тортилган.

Қайд этиш жоиз, Европа давлатлари Россиянинг Украинадаги ҳарбий ҳаракатларига жавобан божхона қоидаларини кучайтирган. 2022 йил март ойидан бери амал қиладиган санкциялар бўйича Европа Иттифоқидан Россияга ҳар бирининг қиймати 300 евродан ошадиган ҳашаматли буюмлар (кийим-кечак, пойабзал, косметика, электроника) олиб кириш тақиқланган. Расмий мақсадлар, дипломатик ваколатхоналар ва халқаро ташкилотлар учун эса истиснолар мавжуд.

Эслатиб ўтамиз, аввалроқ Польша ўз фуқароларини Россияга сафар қилмаслик бўйича огоҳлантирганди. Ташқи ишлар вазирлиги бунга асосий сабаб сифатида Польшанинг Россияда “нотўғри муносабатдаги давлат” сифатида тан олиниши ва уруш ҳолатини кўрсатган.