Россия бензин экспортига тақиқни яна узайтирди

Россия ҳукумати бензин, дизель ёнилғиси ва ёнилғининг бошқа турларини экспорт қилишга қўйилган вақтинчалик тақиқни узайтирди. Бу ҳақда бугун, 27 декабрь куни мамлакат Вазирлар Маҳкамаси матбуот хизмати хабар берди.

“Ҳукумат ички ёнилғи бозорида барқарор вазиятни сақлаш бўйича ишларни давом эттирмоқда. Хусусан, янги қарор билан автомобиль бензинини мамлакат ташқарисига олиб чиқишга қўйилган вақтинчалик тақиқ 2026 йил 28 февралгача узайтирилди”, дейилади хабарда.

Мазкур чора барча экспорт қилувчиларга, жумладан, бевосита ишлаб чиқарувчиларга ҳам татбиқ этилади. Шу санагача дизель ёнилғиси, шунингдек, кема ёнилғиси ва бошқаларни, жумладан, биржа савдолари орқали сотиб олинганларни экспорт қилишга қўйилган тақиқ ҳам узайтирилган. Ҳукуматнинг аниқлик киритишича, бу чекловлар нефть маҳсулотларини бевосита ишлаб чиқарувчиларга нисбатан қўлланилмайди.

Маълумот учун, Россияда дастлаб бу чора жорий йил июль ойининг охирида мамлакатнинг ўнлаб ҳудудларида бензин танқислиги юзага келгани ва биржада ёнилғи нархлари рекорд даражада ошгани фонида жорий этилган эди. Чекловларнинг биринчи босқичида улар фақат трейдерлар, нефть базалари ва йиллик ишлаб чиқариш ҳажми 1 млн тоннадан кам бўлган кичик нефтни қайта ишлаш заводларига тааллуқли бўлган. Август охирида ҳукумат тақиқни 2025 йил 30 сентябргача, кейин эса 2025 йил охиригача узайтирди. Кузда шунга ўхшаш чекловлар дизель ёнилғиси, кема ёнилғиси ва бошқалар экспортига ҳам татбиқ этилди, жумладан биржада сотиб олинган маҳсулотларга ҳам.

Ички ёнилғи бозоридаги вазиятнинг кескинлашуви Украина Қуролли Кучларининг Россия нефтни қайта ишлаш заводларига (НҚИЗ) берган зарбалари фонида юз берди. Август бошидан буён 20 дан ортиқ НҚИЗ зарбага учради, уларнинг бир қисми қисман ёки тўлиқ ишдан чиққан. “Bloomberg” баҳосига кўра, октябрь ойида Россияда нефтни қайта ишлаш ҳажми суткасига 4,86 млн баррелгача камайди – бу июль ойига нисбатан қарийб 10 фоиз кам ва камида сўнгги беш йил ичидаги энг паст кўрсаткичдир.

Шу фонда камида 57 та минтақа аҳолиси бензин танқислигига дуч келди, айрим ҳудудларда эса ҳокимият бир кишига сотиладиган ёнилғи ҳажмига чекловлар жорий қилди. Оқибатда ҳукумат нефть маҳсулотлари экспортидан воз кечди, Беларусдан бензин харидларини оширди ҳамда Хитой ва бошқа Осиё давлатларидан ёнилғи импортини бошлади.