Ривожланишингиз учун барча зарур шароитни яратишга тайёрмиз – Саида Мирзиёева АҚШ бизнесига (видео)

Президент Администрацияси раҳбари Саида Мирзиёева Америка бизнесига мурожаат қилиб, Ўзбекистон уларининг бизнеси муваффақиятли ривожланиши учун барча зарур шароитни яратишга тайёр эканини маълум қилди. Бу ҳақда у жорий йилнинг 19 октябрь куни Америка-Ўзбекистон ишбилармонлик ва инвестиция кенгашининг иккинчи йиғилишида сўз очди.

“Жаноб Давлат котиби, Марказий Осиёга илк ташрифингизни айнан Ўзбекистондан бошлаганингиздан мамнунмиз, хуш келибсиз! Биз буни катта эҳтиром деб биламиз.

Апрель ойида бизни Вашингтонда қабул қилган эдингиз. Бугун эса cизга муносиб меҳмондўстлик кўрсатишдан бахтиёрмиз”, дейди Саида Мирзиёева.

Шунингдек, у ўз нутқида ўзбек меҳмондўстлигининг ўзига хос бир “хусусияти” ҳақида гапирган.

“Сизни олдиндан огоҳлантириб қўймоқчиман: ўзбек меҳмондўстлигининг ўзига хос бир “хусусияти” бор – меҳмонларимиз режалаштирганидан узоқроқ қолиб кетади. Умид қиламизки, Америка бизнеси учун ҳам Ўзбекистон худди шундай қадрдон бўлиб қолади.

Муҳтарам Президент, Вашингтонда Президент Трамп билан учрашганингизда, йирик бир ташаббусга асос солишга келишиб олгандингиз. Сўнгра мазкур Кенгаш олдига қисқа ва аниқ қилиб, вазифа қўйдингиз: “Натижа бўлсин!” дейди Саида Мирзиёева.

Шу билан бирга, Президент Администрацияси раҳбари АҚШ маъмуриятининг ҳам, Ўзбекистон жамоасининг ҳам иш услуби айнан шундай: камроқ сўз, кўпроқ амалий натижа эканини қайд этган.

“Биз Америка томонига шунчаки навбатдаги бир қўмита эмас, балки амалда ишлайдиган механизм яратишни ваъда қилган эдик.

Июнь ойида Тошкентга қарийб 200 та Америка компанияси ташриф буюрди — бу рекорд.

Тўрт ой ўтиб, Давлат котиби бошчилигида яна 100 га яқин АҚШ компанияси келди. Ҳамкорлигимиздаги рекордлар тез янгиланяпти ва бу бизни фақат қувонтиради.

Шу вақт ичида бир муҳим ҳақиқатни англадик: бизнес қоидалар аниқ, эшиклар очиқ ва қўнғироқларга дарҳол жавоб бериладиган жойга интилади. Шу боис биз доимо алоқада бўладиган ва мурожаатларни жавобсиз қолдирмайдиган ҳамкор бўлишга интилмоқдамиз”, дейди Саида Мирзиёева.

Бундан ташқари, у қоидалар тадбиркорлар сўрови бўйича ўзгартирилганини билдирган.

“Тадбиркорлар сўрагани учун биз қоидаларни ўзгартирдик. Энди савдо ҳар икки йўналишда ҳам ривожланмоқда: Ўзбекистон инвестициялари АҚШда янги иш ўринларини яратишга, маҳсулотларининг хариди эса Америка саноат корхоналари фаолиятини қўллаб-қувватлашга хизмат қилмоқда.

Ҳалол шерикликнинг моҳияти шунда: ҳар икки томон ҳам манфаат кўриши керак.

Шу боис, бугун cизларга ваъда берамиз: бу ердаги ҳар бир компанияга бевосита мулоқот учун масъул одам бириктирилади ва Сизлар кўтарган бирор муаммо ҳамраисларнинг эътиборидан четда қолмайди”, дейди Президент Администрацияси.

Шунингдек, у Марко Рубиога мурожаат қилиб, Жексон-Вэник тузатиши масаласига ҳам тўхталган.

“Жаноб Давлат котиби, сиз Жексон-Вэник тузатишини ўтмишдаги “Совуқ уруш сарқити” деб атадингиз. Биз бу фикрга тўлиқ қўшиламиз ва бу чеклов тезроқ бекор қилинишидан мамнун бўламиз. У бекор қилинган куннинг эртасиданоқ мазкур Кенгаш янги марраларга шай бўлади.

Вашингтонда энди шунчаки “имкониятлар” ҳақида гаплашиш давридан ўтганимизни айтгандик.

Бугун Сиздан ҳам худди шуни сўрайман: бизга аниқ лойиҳа билан келинг ёки муаммоингизни олиб келинг — иккисини ҳам қабул қилишга тайёрмиз.

Ўзбекистонни танлаганингиз учун ташаккур!” дейди Саида Мирзиёева.