“Реал” Кроос билан шартномани узайтирмоқчи

“Реал Мадрид” 32 ёшли ярим ҳимоячи Тони Крооснинг шартномасини узайтириши мумкин. Бу ҳақда “Маrcа” нашри хабар берди.

Манбага кўра, жорий мавсум давомида “қаймоқранглилар” раҳбарияти ярим ҳимоячига шартномани 2024 йилгача узайтиришни таклиф қилган, бироқ немис футболчиси ўйлаб кўриш учун вақт сўраган. Тони келаси мавсумда қандай ҳолатда бўлишини кўрмоқчи. Шундан сўнг, Кроос Мадрид клубидаги келажаги ҳақида қарор қабул қилади. Агар, Кроос яхши формада бўлмаса, “Реал”га ортиқча юк бўлишни истамайди.

Қайд этиш жоизки, германиялик футболчига Мадриддаги ҳаёт ёқади. “Реал” бош мураббийи Карло Анчелотти эса ярим ҳимоячини жамоанинг ажралмас бўлаги, деб билади.

Маълумот ўрнида, Кроос 2014 йилнинг июлидан бери “Реал Мадрид”да ўйнамоқда. Футболчининг клуб билан шартномаси 2023 йилнинг июнига қадар мўлжалланган. “Тransfermarkt” интернет порталига кўра, футболчининг бозор қиймати 25 миллион еврони ташкил қилади.

Маъруф Абдумаликов