Paramount Warner Bros. Discovery’ни $110 миллиардга сотиб олди

Paramount кинокомпанияси Warner Bros. Discovery’ни сотиб олиш бўйича битимни ёпди. Бириктирилган компания Skydance деб номланди, иккита киностудиядан ташқари унинг таркибига ўнлаб телеканаллар, жумладан, CBS News ва CNN, шунингдек, Paramount+ ва HBO Max стриминг хизматлари киради. Бу ҳақда компания матбуот хизмати хабар берди.

Шартларга кўра, компания, шунингдек, Warner Bros.’нинг 80 миллиард долларлик қарзини тўлаши керак бўлади. 

Ўтган йилнинг августида медиамагнат Дэвид Эллисон ўзининг Skydance Media кинокомпаниясини Paramount билан бирлаштиришни якунлаган, декабрь ойида эса Warner Bros.’ни сотиб олиш учун Netflix билан курашга киришган. Юқорироқ таклиф ва унинг отаси – Oracle ҳаммуассиси Ларри Эллисон томонидан берилган шахсий молиявий кафолатлар ғалаба қозонишга ёрдам берган.

АҚШ Адлия вазирлиги, Европа Иттифоқи ва бошқа регуляторлар харидни тезда маъқуллаган бўлса-да, июль ойида Paramount Skydance битимни музлатиб қўйишга рози бўлди. Бунга 12 та штат прокурорлари, Америка сценаристлар гильдияси, шунингдек юзлаб актёрлар, режиссёрлар, сценаристлар ва продюсерлар қарши чиққан эди. Индустрия ходимлари бирлашиш истеъмолчилар учун нархларнинг ошишига ва иш ўринларининг қисқаришига олиб келишидан хавотирланди.

Якунда томонлар келишув битимини тузди, унинг доирасида прокурорлар Эллисондан бир қатор ён беришларни талаб қилиб олди. Skydance йилига камида 30 та фильм чиқаришни ва янги асарлар стримингларга чиқишидан олдин уларнинг кинотеатрларда камида 45 кунлик прокатини таъминлашни ўз зиммасига олди.

Компания, шунингдек, CBS ва CNN’нинг таҳририят мустақиллигини таъминлайдиган махсус кенгаш тузади. Ўтган йилнинг декабрь ойида Эллисон АҚШ Президенти Дональд Трампга харид амалга ошган тақдирда CNN’ни “тубдан ўзгартириш”га ваъда берган.

Эслатиб ўтамиз, аввалроқ Prada Group Versace’ни қарийб 1,4 миллиард долларга сотиб олиш бўйича битимни якунлагани ҳақида хабар берилган эди.